Իրանական Fars գործակալության հաղորդմամբ՝ Իրանի նախագահ Մահմուդ Ահմադինեժադը Թեհրանում կայացած Պաղեստինի դիմադրողական շարժման խորհրդաժողովի փակման արարողության ընթացքում, կրկին անդրադառնալով արաբական երկրներում տեղի ունեցած վերջին ամիսների իրադարձություններին, դրանք մարդկային զարթոնք որակեց:
Իրանի առաջնորդ Այաթոլլահ Խամենեին և նրա կողմնակիցները արաբական աշխարհի իրադարձությունները իսլամական զարթոնքի արդյունք են համարում, իսկ Ահմադինեժադը, Այաթոլլահ Խամենեիի տեսակետին հակառակ, կրկին պնդում է, որ արաբական գարունը մարդկային զարթոնքի արդյունք է: Ըստ Ահմադինեժադի՝ արդեն անցել է ազգերին գերեվարելու ժամանակաշրջանը, այսօր մարդկությունը արթնացել է ու այլևս թույլ չի տալու, որ գերտերությունները գերի դարձնեն ազատ մարդուն:
Հիշեցնենք, որ նույն խորհրդաժողովի բացման արարողության ընթացքում Իրանի առաջնորդը, ընդդիմանալով Ահմադինեժադի՝ Պաղեստինի անկախության շուրջ Նյու Յորքում կատարած դրական հայտարարություններին, հայտարարել էր, թե ընդունելի չէ Պաղեստինի նմանօրինակ անկախությունը, որտեղ զուգահեռ քայլով պիտի ճանաչվի նաև Իսրայելի ոչ լեգիտիմ իշխանությունը:
Արդեն մի քանի ամիս է, որ Իրանի առաջնորդն ու նախագահը հրապարակավ փորձում են միմյանց ընդդիմանանալ ու ԶԼՄ-ների միջոցով մեկը մյուսի հայտարարությունները անընդունելի որակել:
