«Ժողովրդի իշխանություն» քաղաքացիական նախաձեռնության անդամ Մովսես Արիստակեսյանից «Առաջին լրատվականը» հետաքրքրվեց, թե ինչ է պետք անել, որպեսզի ԱԺ պատգամավորները հարկատուների միջոցները չծառայեցնեն տարբեր սեմինարների և համաժողովների անվան ներքո հաճախակի արտերկիր մեկնելուն: Մովսես Արիստակեսյանը նշեց, որ պետք է լինի մի մեխանիզմ, որը կորոշի պետական կառավարման մարմինների աշխատանքի արդյունավետությունը: Նա ասաց, որ ինքը կառավարությանն առաջարկել էր ծրագրային բյուջետավորում, սակայն, ցավոք, 2010 թ. բյուջեն չկազմվեց այդ սկզբունքով: Մովսես Արիստակեսյանը մեր զրույցի ժամանակ նշեց նաև, որ Հայաստանի նման երկրի համար շռայլություն է տասնյոթ նախարարություն պահելը, և որոշ նախարարություններ պետք է միավորվեն կամ կրճատվեն: Ըստ նրա` շռայլություն է նաև երեք-չորս փոխնախարար պահելը ամեն մի նախարարությունում, որոնք ունեն անձնական սպասարկման ավտոմեքենաներ, և այդ ամենը կատարվում է հարկատուների հաշվին:
