Բահրեյնի արքայադուստր Նուր բինթ Իբրահիմ Ալ-Խալիֆան, հնարավոր է, մասնակցել է հակակառավարական ցույցերի ժամանակ ձերբակալված բժիշկների կտտանքներին: Այս մասին գրում է The Times-ը:
Ալ-խալիֆան, որը Բահրեյնի թագուհու ազգականն է, ծառայում է թմրանյութերի հարցերով գաղտնի ոստիկանությունում: Բժիշկների խոսքերով` հարցաքննության ընթացքում իրենց ծեծել է ռետինե մահակներով և այլ կտտանքների ենթարկել` փորձելով ստիպել իրենց խոստովանել:
Ընդդիմության հետ դաժան վերաբերմունքի համար մեղադրվում են նաև Բահրեյնի ուժային կառույցների այլ աշխատակիցներ: Մասնավորապես, բժիշկների խոսքերով` որոշ ոստիկաններ սպառանցել են բռնաբարել ձերբակալված կանանց:
Ձերբակալվածների մեծ մասը Մանամայի կենտրոնի հիվանդանոցներից մեկի բժիշկներն են, որոնց մեղադրել են հակակառավարական ցույցերին մասնակցելու և վիրավորներին օգնություն չցուցաբերելու մեջ: Իշխանությունների պնդմամբ` բժիշկներն այդ ժամանակ «գրավել են» հիվանդանոցը, պատանդներ վերցրել և ծառայողական փոխադրամիջոցներն օգտագործել զենք տեղափոխելու համար:
Բահրեյնի տեղեկատվության նախարարության ներկայացուցիչը չի մեկնաբանել արքայադստեր հասցեին հնչած մեղադրանքները: Նա հայտարարել է, որ ուժային կառույցների կողմից ցանկացած չարաշահում կհետաքննվի իրավապաշտպանների անկախ հանձնաժողովի կողմից:
