Ադրբեջանական Trend լրատվական գործակալության փոխանցմամբ՝ ԵԽԽՎ թուրք նախագահ, Թուրքիայի իշխող «Արդարություն և զարգացում» կուսակցությունը (ԱԶԿ) ներկայացնող Մևլյութ Չավուշօղլուն ԵԽԽՎ-ի աշնանային նստաշրջանի ժամանակ հայտարարել է, որ պետք է հարգանքով վերաբերել ԵԽԽՎ Խորհրդարանական ասամբլեայի բյուրոյի որոշմանը, որը վերաբերում է Լեռնային Ղարաբաղի գծով ենթակոմիտեի գործունեության վերականգնմանը.
«Լեռնային Ղարաբաղի գծով ենթակոմիտեի գործունեության վերականգնումը հանդիսանում է ԵԽԽՎ բարյացակամության խորհրդանիշ։ Այդ ենթակոմիտեի ստեղծման մասին գոյություն ունի 2005 թվականին ընդունված բանաձև։ Ենթակոմիտեի նախկին նախագահ լորդ Ռասել Ջոնսոնի մահից հետո այն դադարեցրեց իր գործունեությունը։ ԵԽԽՎ բյուրոն դրա գործունեության վերականգնման վերաբերյալ որոշում է ընդունել։
Սակայն այդ որոշումը հավանության չարժանացավ հայկական պատվիրակության կողմից։ Ես հասկանում եմ նրանց, սակայն համաձայն չեմ այն կարծիքի հետ, թե ենթակոմիտեի գործունեության վերականգնումը տեղի է ունեցել իմ նախաձեռնությամբ։ Դա միաձայն ընդունել է ԵԽԽՎ բյուրոն։
Ենթակոմիտեն ընդհանրապես չի զբաղվելու երկակի ստանդարտների հետ կապված գործերով։ Նա զբաղվելու է հակամարտության հարուցած հումանիտար խնդիրներով, որոնք պետք է կարգավորվեն։ Այսօր տեղի է ունենալու ենթակոմիտեի հերթական նիստը, որին մասնակցելու են թե՛ ադրբեջանական, թե՛ հայկական պատվիրակությունները»։
Հիշեցնենք, որ այս տարվա հունվարի 28-ին կայացած ԵԽԽՎ բյուրոյի նստաշրջանում ԵԽԽՎ թուրք նախագահ Մևլյութ Չավուշօղլուի հավանությամբ վճռվեց վերականգնել Լեռնային Ղարաբաղի հարցով ԵԽԽՎ ենթակոմիտեն, ինչը հարուցեց հայկական կողմի դժգոհությունը:
Ինչ վերաբերում է ԵԽԽՎ նախկին նախագահ, Լեռնային Ղարաբաղի հարցով ենթակոմիտեի ղեկավար լորդ Ռասել Ջոնսթոնին, ապա վերջինս մահացել է Փարիզում 2008 թվականի հուլիսի 27-ին` 76 տարեկան հասակում: