Շիրակի մարզում գործազրկությունը հանրապետական միջինից բարձր է: Ներկայում Գյումրիի զբաղվածության մարզային կենտրոնում գրանցված են 10,708 գործազուրկներ, որոնց 65-68%-ը կանայք են, իսկ մեծ մասը՝ շուրջ 8,000 քաղաքացիներ, Գյումրիից են: Բնականաբար, ոչ բոլոր գործազուրկներն են գրանցվում կենտրոնում:
People in Need չեխական կազմակերպության նախաձեռնած մարզային շրջայցի ընթացքում Գյումրի այցելած լրագրողներին Զբաղվածության կենտրոնի տնօրեն Ամալյա Ադամյանը տեղեկացրեց, որ վերջերս Գյումրիում կազմակերպվել էր աշխատանքի տոնավաճառ, որին մասնակցած 33 գործատուները ներկայացրել էին 142 թափուր հաստիքների հայտարարություն, իսկ այցելել են 1,500 աշխատանք փնտրողներ: Ա.Ադամյանի խոսքով՝ արդեն ուղղակի արդյունքներ կան, սակայն նաև կան շատ գործատուներ, որոնք դժվարությամբ են համագործակցում կենտրոնի հետ:
«Կենտրոնում հատուկ ուշադրություն է դարձվում հաշմանդամների աշխատանքի տեղավորման հարցերին, և գործատուներից շատերը համաձայնություն են տվել աշխատանքի վերցնել հաշմանդամի»,- ասաց Ա.Ադամյանը՝ հավելելով, որ հաշմանդամություն ունեցող քաղաքացիների աշխատավարձի 50%-ը (բայց ոչ ավելի, քան նվազագույն աշխատավարձը) փոխհատուցում է պետությունը:
Ա.Ադամյանի խոսքով՝ հաճախ աշխատանքի պահանջարկն ու առաջարկը չեն համապատասխանում իրար, և այդ դեպքում կազմակերպվում են մասնագիտական դասընթացներ հենց գործատուների մոտ: Վերջին շրջանում երիտասարդներն առավել հաճախ են դիմում կենտրոնին՝ աշխատանք գտնելու համար:
«Այստեղ հանրապետական միջինից ավելի ցածր է աշխատանքի վարձատրությունը և շատ օբյեկտիվ է, որ քաղաքացիները հաճախ հրաժարվում են աշխատանքից»,- նկատեց Ա.Ադամյանը:
