«Առավոտ»-ի խնդրանքով անդրադառնալով կրպակների ու բենզալցակայանների վնասակարության մասին հրապարակումներին` Երևանի քաղաքապետ Կարեն Կարապետյանը ասել է. «Շատ վատ է»:
Բայց և Չարենցի 59 տան տակ և մայթի երկայնքով աշխատող «ՌԱՆ օյլ» ընկերությանը պատկանող բենզինի ԲՈՒԴԿԱՅի մասին խոսելով` հավելել է. «Այն օրինական է: Իր հետ որ նստում-խոսում ենք` փոխհատուցման խնղիր է առաջադրում»:
Թերթի հարցադրմանը, թե քաղաքապետարանը պատրաստ չէ՞ նման փոխհատուցման՝ պրն. Կարապետյանն արձագանքել է. «Ոչ, մենք պատրաստ ենք, բայց մենք դրա հնարավորությունը պետք է ունենանք: Պետք է գիտակցվի, որ երբ բնակիչը մեզնից պահանջում է՝ շատ լավ է, որ պահանջում է: Սա «պոզա» չի, որ ասում ենք, թե մենք շահագրգռված ենք, որ երևանցու մեջ զարթնի սեփականատիրոջ իրավունքը, որ ինքն անընդհատ մեզնից պահանջի:
Բայց նաև՝ բացի պահանջելուց, ինքը հասկանա, որ որպես քաղաքի բնակիչ ինքը պարտավորություն ունի: Ու դա նաև չի նշանակում, թե կախարդական փայտիկ ունենք, որ մի օրվա մեջ կուտակված հարցադրումները լուծենք, բոլոր անհրաժեշտ ներդրումները բերենք, դնենք: Չկա նման բան: Մի բան պիտի հասկանանք, որ մեր երկիրը, մեր քաղաքը կառուցողը մենք ենք: Ու ինչպե՞ս դա պետք է անենք՝ մեթոդաբա՛ր, ամեն օր մեր պարտականությունները կատարելով:
Հիմա գալո՞ւ է մի պահ, որ դրանք էլ են վերանալու: Գալո՛ւ է: Ե՞րբ: Այ, երբ որ մեր «մուսկուլը» թույլ տա»:
