«Մեր նպատակն է, որ ծնողները առնվազն համոզված լինեն՝ գործերի քննությունը արդար է եղել, կամ եթե իրականում դժբախտ պատահար է, ապա համոզվեն դրանում և, ընդհանրապես, հավատան արդարադատությանը, հակառակ դեպքում այս երևույթները կվնասեն մեր բանակի հեղինակությանը, կվնասեն զինված ուժերի հրամանատարությանը»,- բանակում գրանցվող մահացությունների վերաբերյալ ՄԻՊ գրասենյակի նախաձեռնությամբ ԱԺ-ում կազմակերպված քննարկումից հետո լրագրողների հետ հանդիպման ժամանակ նշեց ԱԺ պաշտպանության, ներքին գործերի և ազգային անվտանգության հանձնաժողովի նախագահ, ԱԺ ՀՅԴ-ական պատգամավոր Հրայր Կարապետյանը:
Նա նշեց, որ իր հանձնաժողովը ուսումնասիրում է բոլոր գործերը և գրություններ է ուղարկել զինդատախազին: Կարապետյանը տեղեկացրեց, որ նոր զինդատախազ Բենիկ Կոստանյանը սկսել է քննել բոլոր գործերը և իրեն հավաստիացրել, որ բոլոր գործերը, անգամ տասը տարվա վաղեմություն ունեցողները, քննվելու են. «Մենք անընդհատ խորհրդակցում ենք, քանզի մեր նպատակն է, որ մարդիկ հավատան»:
Կարապետյանը նկատեց, որ թեև նշվում է, թե բանակում մահացության դեպքերը նվազել են, բայց դա չի կարող իրենց հանգստացնել, որովհետև եղած քանակը երևացող է. «Այս հանդիպումներն ու քննարկումները նրա համար են, որ բանակում գրանցվող նման դեպքերը կանխվեն, բայց խոսել, որ 100 տոկոսով կանխվել են՝ դեռ շուտ է»:
