Իրանը Ռուսաստանին համարում է իր ռազմավարական գործընկերը: Իրան-Ռուսաստան հարաբերություններն այժմ ավելի սերտ և ամուր են, քան երբևէ։ Այս մասին Մոսկվայում իր ռուսաստանցի գործընկեր Սերգեյ Լավրովի հետ հանդիպման ժամանակ հայտարարել է Իրանի արտգործնախարար Աբբաս Արաղչին։
Mehr լրատվական գործակալության տեղեկացմամբ՝ Մոսկվայում Ռուսաստանի արտգործնախարար Սերգեյ Լավրովի հետ հանդիպման ժամանակ Իրանի բարձրաստիճան դիվանագետ Աբբաս Արաղչին շնորհակալություն է հայտնել Ռուսաստանին իրանական պատվիրակությանը ջերմ հյուրընկալելու համար՝ հավելելով, որ «երեկ ես շատ լավ և երկար հանդիպում ունեցա պարոն Պուտինի հետ և նրան փոխանցեցի Իսլամական հեղափոխության առաջնորդի գրավոր ուղերձը»։
«Սա և՛ ուղերձ էր պարոն Պուտինին, և՛ ողջ աշխարհին, որ Իրանը Ռուսաստանին համարում է իր գլխավոր և ռազմավարական գործընկերը և խորհրդակցում է կարևոր հարցերի շուրջ», – նշել է Արաղչին Լավրովի հետ հանդիպմանը։
«Իրանի և Ռուսաստանի միջև հարաբերությունները, թերևս, երբեք այսքան սերտ և ամուր չեն եղել պատմության ընթացքում: Մենք վերջերս Մոսկվայում ստորագրեցինք համապարփակ ռազմավարական պայմանագիր, որն ընդլայնեց և բարձրացրեց մեր հարաբերությունները շատ ավելի բարձր մակարդակի», – հավելել է նա:
Արաղչին նշել է, որ այդ պայմանագիրը ստեղծում է երկու երկրների նոր հարաբերությունների հիմքերը, և ամենակարևորը «երկարաժամկետ հեռանկար է տալիս այս հարաբերություններին»։
«Մենք այսօր շատ հարցեր ունենք խորհրդակցելու և կարծիքներ փոխանակելու թե՛ երկկողմ հարաբերություններում, թե՛ տարածաշրջանային, թե՛ միջազգային կարևոր հարցերում», – եզրափակել է իրանցի նախարարը։
Ռուսաստանի Դաշնության արտաքին գործերի նախարարության տեղեկացմամբ՝ ՌԴ ԱԳ նախարար Սերգեյ Լավրովն իրանցի գործընկերոջ հետ բանակցությունների բացման խոսքում գոհունակություն է հայտնել Աբբաս Արաղչիի և ՌԴ նախագահ Վլադիմիր Պուտինի հանդիպման առնչությամբ՝ նշելով, որ հանդիպումն ընդգծել է երկկողմ քաղաքական երկխոսության աննախադեպ դինամիկան։
«Նախագահ Մ. Փեզեշքիանի այցի ընթացքում ստորագրվեց պատմական միջպետական պայմանագիր, որը հաստատեց մեր գործընկերության ռազմավարական բնույթը։ Այս տարվա ապրիլի 16-ին մենք ավարտել ենք այս կարևորագույն փաստաթղթի վավերացման գործընթացը Ռուսաստանի Դաշնային ժողովում։ Համաձայնագիրն ամուր հիմքեր է ստեղծում երկկողմ հարաբերություններում մեր համագործակցության հետագա որակական ընդլայնման և միջազգային ասպարեզում համակարգման համար», – ասել է Լավրովն՝ անդրադառնալով երկու երկրների միջև ստորագրված միջպետական պայամանագրին։
