Ռուսական Regnum լրատվական գործակալության փոխանցմամբ՝ Վարշավայում ընթացող «Արևելյան գործընկերության» երկրորդ գագաթնաժողովում հանդիպել են Վրաստանի և Ադրբեջանի նախագահներ Միխեիլ Սաակաշվիլին և Իլհամ Ալիևը։
Վրաստանի նախագահական ապարատի հաղորդմամբ՝ դա Վարշավայում Սաակաշվիլիի անցկացրած առաջին երկկողմանի հանդիպումն էր։ Հանդիպման ժամանակ Սաակաշվիլին ու Ալիևը քննարկել են երկու երկրների միջև քաղաքական և առևտրա-տնտեսական համագործակցության խորացման, էներգետիկ անվտանգության ապահովման հարցերը։
Բացի այդ, կողմերը քննարկել են ԵՄ-ին Վրաստանի և Ադրբեջանի անդամակցության հեռանկարները։
Հիշեցնենք, որ ԵՄ կողմից ստեղծված «Արևելյան գործընկերություն» նախագիծը միտված է նրան, որ Հայաստանը, Ադրբեջանը, Վրաստանը, Մոլդովան, Բելառուսը և Ուկրաինան է՛լ ավելի մերձենան ԵՄ-ին:
Թեև այն չի ենթադրում անդամակցություն ԵՄ-ին, այնուամենայնիվ, նախատեսում է քաղաքական ու տնտեսական մերձեցում: Այս ծրագրի մեկնարկը տրվել է 2009 թվականի մայիսի 7-ին Պրահայում կայացած ԵՄ գագաթնաժողովում:
