JPMorgan Chase բանկը շարունակում է պնդել, որ տնտեսական անկումը հավանական է: Բանկի գնահատմամբ՝ ԱՄՆ-ում և համաշխարհային տնտեսությունում անկման հավանականությունը 60% է, չնայած նախագահ Դոնալդ Թրամփը հայտարարել է մաքսատուրքերի մեծ մասի 90-օրյա դադարի մասին։
«Առևտրի և ներքին ֆինանսական քաղաքականության շուրջ ընթացող անորոշությունը, բաժնետոմսերի շուկայում շարունակվող զգալի կորուստները և վստահության նվազումը դժվարացնում են ԱՄՆ-ի համար տնտեսական անկումից խուսափելը»,- նշել են JPMorgan-ի տնտեսագետները իրենց վերջին զեկույցում։
Բանկն ընդգծել է, որ եթե մյուս բոլոր գործոնները մնան անփոփոխ, ապա «Ազատագրության օրը» հայտարարված՝ առանձին երկրների դեմ ուղղված խիստ մաքսատուրքերի չեղարկումը դրական քայլ է։ «Այնուամենայնիվ, իրավիճակը մնում է մտահոգիչ, քանի որ ոչ բոլոր գործոններն են կայուն»,- հայտարարել է բանկը։
Մասնավորապես, JPMorgan-ը նշել է, որ գործող 10% համընդհանուր մաքսատուրքերը լուրջ խնդիր են՝ դրանք 7,5 անգամ ավելի ուժեղ ազդեցություն ունեն, քան 2018-2019 թվականների առևտրային պատերազմը։ «Ավելի մեծ անակնկալ է Չինաստանի դեմ մաքսատուրքերի բարձրացումը մինչև 125%, ինչը մոտ 860 միլիարդ դոլարի հարկային բեռ է՝ առանց փոխարինումները հաշվի առնելու»,- ավելացրել է բանկը։
«Մեր կարծիքով՝ ԱՄՆ-ի առևտրային պատերազմը դեռ ավարտված չէ։ Այսօրվա իրադարձությունները միայն սկզբի ավարտն են», – եզրափակել է JPMorgan-ը։
