Իսրայելի վարչապետ Բենիամին Նաթանյահուի հետ Սպիտակ տանը կայացած հանդիպմանը ԱՄՆ նախագահ Թրամփը անդրադարձել է իսրայել-թուրքական լարվածությանն ու ասել, որ կարող է լինել հարաբերության կարգավորման միջնորդ, եթե Իսրայելն իրեն դրսևորի «գիտակից»:
Թրամփը հայտարարել է, որ լավ հարաբերություն ունի Էրդողանի հետ, նրան ուժեղ և խելացի մարդ է համարում ու պատրաստ է աշխատել լարվածությունը կարգավորելու համար, եթե Իսրայելը լինի «գիտակից»: Դա ասելիս Թրամփը մատնացույց է արել Նաթանյահուին՝ ասելով՝ դուք պետք է լինեք գիտակից:
Սա ուշագրավ պատկեր է, որը թողնում է տպավորություն, որ ԱՄՆ նախագահ Թրամփը Թուրքիայով սպառնում է Նաթանյահուին: Թուրք-իսրայելական հարաբերությունը բավականին լարվում է, ինչի նոր կատալիզատոր է Սիրիան: Իսրայելը հարվածում է Սիրիային և տարածքներ վերցնում, այն դեպքում, երբ Սիրիայի այսպես ասած «հովանին» Թուրքիան է:
Հետևաբար, Սիրիային հարվածները, ըստ էության, հարված են Թուրքիային ու դրա հեղինակությանը, ինչը Էրդողանի համար խնդիր է: Այդ պատճառով նա պատրաստվում է ուժեղացնել Սիրիայում Թուրքիայի ռազմական ներկայությունը, ինչն էլ հղի է Իսրայելի հետ կամ ուղիղ, կամ այսպես ասած պրոքսի բախումով: Իսկ դա Իսրայելի համար խնդիր է, քանի որ անկասկած է, որ Թուրքիան ունի բավականին ռազմական հզորություն՝ Իսրայելի համար լուրջ խնդիրներ առաջացնելու համար:
Վաշինգտոնում Թրամփը Նաթանյահուին փաստացի ասում է, որ կարող է կանխել այդ խնդիրները, եթե Նաթանյահուն լինի «գիտակից»: Թե հատկապես ինչ նկատի ունի Թրամփը «գիտակից» ասելով, միարժեք բարդ է ասել, բայց ըստ ամենայնի, Թրամփը փորձում է Մերձավոր Արևելքում այսպես ասած խաղարկել երկակի զսպման մի մեխանիզմ՝ Թուրքիա-Իսրայել՝ այդպիսով թերևս փորձելով նաև իր համար թուլացնել իսրայելական ճնշումը Իրանի հարցում: Սա, իհարկե, Մերձավոր Արևելքի վերաձևման պրոցեսում փազլի կտորներից մեկն է միայն: Հիմնական պատկերը թևավորվելու է թերևս Իրանի շուրջ հնարավոր բանակցության արդյունքում:
