Թուրքական Milliyet թերթի փոխանցմամբ՝ երեկ՝ ժամը 22.00-ին, Թուրքիայի հարավարևելյան հատվածում ընկած Շըրնաք նահանգի Բեյթյուշեբբափ շրջանում բախվել են թուրքական անվտանգության ուժերը և Թուրքիայում ահաբեկչական հռչակված ու արգելված Քրդստանի աշխատավորական կուսակցության (PKK) զինյալները։
Քուրդ զինյալները երկարափող զենքերով գնդակոծել են պարեկություն կատարող թուրքական անվտանգության ուժերին, որից հետո սկսվել է փոխհրաձգություն։ Բախման արդյունքում վիրավորվել է 5 զինծառայող, որոնցից 2-ը քիչ անց մահացել են։ Զոհվել է նաև 3 քուրդ զինյալ։
Հիշեցնենք, որ թեև PKK-ն հիմնադրվել է 1978 թվականին (հիմնադիր՝ Աբդուլլահ Օջալան), Թուրքիայում նրա ակտիվ զինված պայքարը սկսվել է 1984 թվականին։ Ցայժմ այդ պայքարի արդյունքում երկու կողմից զոհվել է 40-45 հազար մարդ։
Ի դեպ, այս տարվա օգոստոսին Թուրքիայի տրանսպորտի նախարար Բինալի Յըլդըրըմը հայտնեց, որ 1984-2011 թվականներին PKK-ի դեմ մղած 27-ամյա պայքարում Թուրքիայի ուղղակի ծախսերը կազմել են 300 միլիարդ դոլար։ Սակայն անուղղակի ծախսերը շատ ավելի մեծ են՝ 700 միլիարդ դոլար։ Ընդհանուր առմամբ, PKK-ի դեմ 27-ամյա պայքարը Թուրքիային արժեցել է 1 տրիլիոն դոլար։
