Տորնադոներն ու ուժեղ փոթորիկները հարվածել են ԱՄՆ-ի հարավային և միջին արևմտյան մի շարք շրջանների՝ տապալելով էլեկտրասյուներ ու ծառեր, պոկելով տների տանիքներ և տասնյակ մետրերով օդ բարձրացնելով բեկորներ:
Արքանզաս նահանգի հյուսիսարևելյան հատվածում կարճ ժամանակով հայտարարվել է տորնադոյի մասին արտակարգ նախազգուշացում: ԱՄՆ-ի Օդերևութաբանական ազգային ծառայությունը սոցիալական ցանցերում զգուշացրել է բնակիչներին. «Սա կյանքին սպառնացող իրավիճակ է: Անմիջապես ապաստան փնտրեք»:
Արքանզասի, Իլինոյսի, Ինդիանայի, Միսսուրիի և Միսիսիպիի տարբեր շրջաններում հայտարարվել են տորնադոների և ուժեղ ամպրոպային փոթորիկների մասին նախազգուշացումներ: Օդերևութաբանները եղանակային վատ պայմանները բացատրել են օրվա ընթացքում կուտակված ջերմությամբ, մթնոլորտի անկայունությամբ, ուժեղ քամիներով և Մեքսիկական ծոցից ներթափանցող խոնավության փոխազդեցությամբ:
Առաջիկա օրերին կանխատեսվում է նաև մահաբեր ջրհեղեղների վտանգ, քանի որ արևելք շարժվող ուժեղ փոթորիկները կարող են էլ ավելի ուժգնանալ: Օդերևութաբանական ազգային ծառայությունը նախազգուշացրել է, որ այս հզոր մրրկային համակարգը մինչև շաբաթ կարող է հանգեցնել «զգալի և կյանքին սպառնացող ջրհեղեղների»:
