Ռուսական Regnum լրատվական գործակալության փոխանցմամբ՝ Մեծ Բրիտանիայի էներգետիկայի և կլիմայի փոփոխությունների նախարար Չառլզ Հենդրին երեկ Բաքվում լրագրողներին հայտարարել է, որ, ներկայիս դրությամբ, այժմեական է համարվում ադրբեջանական գազի փոխադրումը եվրոպական շուկա։
Նրա խոսքերով՝ այդ հարցը պահանջում է շուտափույթ լուծում. «Շահ Դենիզ» գազային հանքավայրը խոշորագույններից մեկն է, և շատ կարևոր է, որպեսզի այդ հանքավայրի գազը հնարավորինս շուտ հասնի եվրոպական շուկա։
Ինչ վերաբերում է այլ աղբյուրներին, ինչպիսիք են թուրքմենական և իրաքյան գազը, ապա դրանց փոխադրումը կլինի ավելի ուշ։ Եվրոպան, մասնավորապես Մեծ Բրիտանիան, շահագրգռված է էներգոմատակարարումների անվտանգությամբ ու նոր երթուղիներով։
Ադրբեջանի օտար ներդրումների ավելի քան 50 տոկոսն ապահովում է Մեծ Բրիտանիան։ Ցայժմ Մեծ Բրիտանիան Ադրբեջանում ներդրել է ավելի քան 50 միլիարդ ֆունտ ստերլինգ։ Ադրբեջանում, նավթագազային ոլորտից բացի, կան տնտեսական այլ ոլորտներ, ուր երկու երկրների համագործակցության համար կան հեռանկարներ»։
Հիշեցնենք, որ օրեր առաջ British Petroleum (BP) ընկերությունն առաջ քաշեց Ադրբեջանը Եվրոպային կապող գազային նոր նախագիծ, որը ստացավ Հարավարևելյան գազատար անվանումը։ BP-ն նախատեսել է կառուցել Nabucco-ի համեմատ ավելի հարմարավետ ու էժան գազատար, որն ունենալու է 1300 կիլոմետր երկարություն և գոյություն ունեցող ենթակառույցների միջոցով «Շահ Դենիզ»-ը կապելու է Թուրքիայի արևմուտքի հետ, որտեղից էլ ադրբեջանական գազը Բուլղարիայով, Ռումինիայով և Հունգարիայով կհասնի Ավստրիա՝ ինչպես որ նախատեսված է Nabucco-ի պարագայում։
Հարավարևելյան գազատարը փորձում է համատեղել քաղաքականության ու բիզնեսի պահանջները, քանի որ շատ գործարարներ կարծում են, որ մոտ 4000 կիլոմետր երկարությամբ Nabucco գազատարը չափազանց քաղաքականացված ու վիթխարի նախագիծ է։ Nabucco գազատարը նախատեսված է ոչ միայն ադրբեջանական գազի, այլև ողջ Կասպյան ավազանի, Իրաքի ու Մերձավոր Արևելքի գազի ներկրման համար։