Ադրբեջանական ANS PRESS-ի փոխանցմամբ՝ ԵԱՀԿ Մինսկի խմբի համանախագահներ Բեռնար Ֆասիեն (Ֆրանսիա), Ռոբերտ Բրադտկեն (ԱՄՆ), Իգոր Պոպովը (Ռուսաստանը) և ԵԱՀԿ գործող նախագահի անձնական ներկայացուցիչ Անջեյ Կասպրշիկը սեպտեմբերի 29-ին Վարշավայում հանդիպել են Հայաստանի և Ադրբեջանի նախագահներ Սերժ Սարգսյանի ու Իլհամ Ալիևի հետ՝ ղարաբաղյան հակամարտության խաղաղ կարգավորմանը հասնելուն ուղղված հետագա քայլերը քննարկելու համար։
Համանախագահները հաստատել են Ֆրանսիայի, ԱՄՆ-ի ու Ռուսաստանի նախագահներ Նիկոլա Սարկոզիի, Բարաք Օբամայի ու Դմիտրի Մեդվեդևի կողմից Դովիլյան հայտարարությամբ ստանձնած այն պարտավորությունը, թե աջակցելու են կողմերին այդպիսի պայմանավորվածություն ձեռք բերելու հարցում։
Համանախագահները կողմերին ներկայացրել են գործողությունների պլան, որոնք վերաբերում են առաջիկա ամիսներին՝ ընդհուպ մինչև դեկտեմբերին Վիլնյուսում կայանալիք ԵԱՀԿ Նախարարների խորհրդի նստաշրջանը։ Համանախագահներն աշխատելու են կողմերի հետ՝ հարթելու համար հակամարտության համապարփակ խաղաղ կարգավորման համար որպես հիմք ծառայող «հիմնարար սկզբունքներին» առնչվող տարաձայնությունները։
Համանախագահները նաև բոլոր կողմերին կառաջարկեն հավելյալ միջոցներ գործադրել հրադադարի ռեժիմի իրագործման ամրապնդման, տեղական մթնոլորտի բարելավման և տարածաշրջանի ժողովուրդների միջև փոխըմբռնմանը նպաստելու համար։
Համանախագահները մտադիր են այդ աշխատանքային պլանի իրագործման համար մոտ ապագայում այցելել տարածաշրջան։
