Վենեսուելայի նախագահ Ուգո Չավեսը երեկ սոֆթբոլ է խաղացել` հայտարարելով, որ իր վերջին անալիզները ցույց են տվել, որ առողջական վիճակը գերազանց է, և հերքել է բոլոր այն լուրերը, թե իրեն շտապ հոսպիտալացրել են, քանի որ կտրուկ վատացել է առողջական վիճակը: Այս մասին հաղորդում է Associated Press գործակալությունը:
Չավեսը ասել է, որ ինքը առողջացման ճանապարհին է և նույնիսկ սկսել է քաշ հավաքել վերջին երեք ամիսների քիմիաթերապիայից հետո: Նա հրաժարվել է ասել, թե ինչ տեսակի քաղցկեղ է իր մոտ հայտնաբերվել. «Գնացե՛ք հիվանդանոց և հարցրե՛ք ցանկացածի, ով հիվանդ է քաղցկեղով`«ի՞նչ հիվանդ եք դուք, ի՞նչ տեսակի քաղցկեղ է»: Արդյոք դրանում մարդուն տխրեցնող ոչինչ չկա՞»,- վրդովվել է նա:
Երեկ ԱՄՆ-ում լույս տեսնող El Nuevo Herald թերթը գրել էր, թե Վենեսուելայի նախագահ Ուգո Չավեսին շտապ հոսպիտալացրել են երիկամային անբավարարության ախտանիշով: Նշվում էր, որ Չավեսը հոսպիտալացվել է սեպտեմբերի 26-ին առողջական վիճակի կտրուկ վատթարացման պատճառով, ինչը հետևանք է վերջին ամիսներին քաղցկեղի դեմ պայքարելու համար անցած քիմիաթերապիայի բացասական ազդեցության:
Սակայն քիչ անց Վենեսուելայի տեղեկատվության նախարար Անդրես Իզարրան հերքել էր այդ լուրը. «Al Nuevo Herald-ի լրագրողներին է պետք հիվանդանոց տեղափոխել, այն էլ՝ հոգեբուժարան»,- գրել էր նախարարը Twitter-ի իր էջում:
