Նախօրեին տեղի է ունեցել Հայաստանի և Հունգարիայի արտգործնախարարների հեռախոսազրույցը: Այս տեղեկությունը որոշակիորեն մնաց ավելի հնչեղ տեղեկատվության ստվերում՝ կապված Իրանի արտգործնախարարի Հայաստան այցի, Հայաստանի և ՌԴ արտգործնախարարների հեռախոսազրույցի հետ: Հունգարիայի ԱԳ նախարարի հետ Արարատ Միրզոյանի հեռախոսազրույցը, սակայն արժանի է ուշադրության:
Դրա ընթացքում, ըստ պաշտոնական տեղեկատվության, Հայաստանի ԱԳ նախարարն անդրադարձել է Ադրբեջանի հետ Խաղաղության պայմանագրի տեքստի համաձայնեցմանն ու դրա ստորագրման կարևորությանը: Հայտնի է Հունգարիայի սերտ հարաբերությունն Ադրբեջանի հետ: Բուդապեշտը նաև Թյուրքալեզու պետությունների կազմակերպության դիտորդ է: Հունգարիայի վարչապետ Վիկտոր Օրբանը նախորդ տարի օկուպացված Շուշիում անցկացված ԹՊԿ գագաթնաժողովի այսպես ասած գլխավոր գործող անձն էր, հատկապես Էրդողանի բացակայության պայմաններում:
Այս հանգամանքը հնարավոր է դարձնում, որ Երևանը Հունգարիան դիտարկի Ադրբեջանի հետ կոմունիկացիայի հնարավորություններից մեկը: Միևնույն ժամանակ, վերը նշածս հանգամանքներն Ադրբեջանին հնարավորություն են տալիս Բուդապեշտը դիտարկել Հայաստան-ԵՄ գործակցության որոշակի հանգամանքների և հեռանկարների «արգելակ», եթե դրանք առաջացնեն Ադրբեջանի դժգոհությունը: Հայաստանի և Հունգարիայի ԱԳ նախարարների հեռախոսազրույցի ընթացքում քննարկվել է նաև Հայաստան-ԵՄ գործակցության թեման:
Նախորդ տարի, երբ Հայաստանը ԵՄ այսպես ասած Խաղաղության հիմնադրամի միջոցներից պետք է ստանար տասը միլիոն եվրոյի ոչ մահաբեր պաշտպանական նշանակության օժանդակություն, այդ որոշումը տևական ժամանակ արգելակում էր հենց Հունգարիան: Ի վերջո Հունգարիան տվեց հավանություն: Ընդ որում՝ տեղեկություն հրապարակվեց, որ դրա դիմաց ԵՄ-ն համաձայնել է նույն հիմնադրամից աջակցություն ցուցաբերել նաև Հայաստանին:
Արարատ Միրզոյանի ու Սիյարտոյի հեռախոսազրույցը կայացել է այն օրը, երբ Միրզոյանի տեղակալ Հովհաննիսյանն էլ խորհրդարանում հայտնել է, որ Հայաստանը ներկայացրել է ԵՄ խաղաղության հիմնադրամից օժանդակություն ստանալու երկրորդ հայտը: Հնարավոր է, որ Երևանը ձեռնամուխ է եղել «հունգար-ադրբեջանական» արգելքը հաղթահարելուն:
