Ազգային ժողովում մեկնարկել են «Հանրային աղմուկը՝ որպես համակեցության կանոնների պահպանման խոչընդոտ» թեմայով խորհրդարանական լսումներ։ ԱԺ առողջապահության հարցերի մշտական հանձնաժողովի նախագահ Արսեն Թորոսյանի խոսքով՝ սա կարևոր թեմա է, քանի որ ձայնն ազդում է բոլորի օրգանիզմի վրա, այդ թվում՝ բացասական։ «Շատ տեղերում ձայնն օգտագործվում է որպես խոշտանգման միջոց, քանի որ այն կարող է կտրուկ խաթարել մարդու առողջությունը»,- նշել է նա։
Թորոսյանի խոսքով՝ հարց է ծագում, թե որն է ավելի կարևոր՝ հանրության իրավունքն ու առողջությունը, թե անհատի՝ զվարճանալու կամ իր կոնկրետ գործն անելու իրավունքը. «Ինձ համար այդ երկընտրանքը շատ պարզ է. իհարկե, հանրության իրավունքը պետք է գերակայի»։ Սակայն, նրա դիտարկմամբ, մշակութային առանձնահատկությունները հաճախ այլ բանի մասին են վկայում։
Թորոսյանը նաև ընդգծել է, որ խնդրին անհրաժեշտ է լուծում տալ նաև օրենսդրական փոփոխությունների միջոցով. «Եվ ոչ միայն օրենսդրական փոփոխություններով, որոնք կարևոր են և կիրականացվեն, այլև՝ որպես հանրություն, մեր մեջ ինքնագիտակցությամբ և փոփոխություններով»։
