Եմենի «Անսար Ալլահ» շարժման հութիները ստանձնել են Իսրայելի ուղղությամբ բալիստիկ հրթիռի արձակման պատասխանատվությունը՝ հայտարարելով, որ հարվածն ուղղված է եղել Թել Ավիվի «Բեն Գուրիոն» օդանավակայանին: Այդ մասին տեղեկանում է «Ինտերֆաքս» գործակալությունից:
«Եմենի զինված ուժերը հաջողված ռազմական գործողություն են իրականացրել օկուպացված Յաֆֆոյի շրջանում գտնվող «Բեն Գուրիոն» օդանավակայանի դեմ՝ օգտագործելով Palestine-2 հիպերձայնային բալիստիկ հրթիռ», – ասվում է հութիների ներկայացուցիչ Յահյա Սարիի հայտարարության մեջ, որը հրապարակվել է Telegram-ում։
Սարին նշել է, որ գործողությունը «հաջողությամբ հասել է իր նպատակին»։
Բացի այդ, նա հայտարարել է, որ հութիներն «ակտիվացրել են գրոհները Կարմիր ծովում հակառակորդի ռազմանավերի», այդ թվում՝ ԱՄՆ-ի միջուկային էներգիայով աշխատող «Հարի Թրուման» ավիակրի վրա:
«Մենք կշարունակենք արգելափակել իսրայելական նավագնացությունը և աջակցել Գազային այնքան ժամանակ, քանի դեռ ագրեսիան չի դադարեցվել, և պաշարումը չի վերացվել», – հայտարարել է հութիների ներկայացուցիչը:
«Ավիահարվածները Եմենին չեն խանգարի կատարել Պաղեստինին աջակցելու իր պարտականությունը», – հավելել է նա։
