ԱՄՆ-ում ձերբակալվել է հանցագործ անցյալ ունեցող 2901 անօրինական ներգաղթյալ: Այս մասին հաղորդվում է ԱՄՆ Իմիգրացիոն և մաքսային ոստիկանության կայքում:
Գործողությունն իրականցվել է 50 նահանգներում և տևել 7 օր: Դրանում մասնակցել է գերատեսչության 1900 աշխատակից: Առգրավվել է 18 միավոր զենք: Ձերբակալվածները նախկինում դատապարտված են եղել սպանության, զինված կողոպուտի, թմրանյութերի վաճառքի և այլ հանցագործությունների համար:
Գերատեսչության հաղորդագրության մեջ ասվում է, որ գործողությունն իրականացվել է նախագահ Բարաք Օբամայի վարչակազմի ներկայիս քաղաքականության շրջանակներում: Ըստ դրա` առաջնային խնդիր է համարվում այն անօրինական ներգաղթյալների հետապնդումը, որոնք հանցանք են գործել ԱՄՆ տարածքում: Մյուս կողմից, հանցագործ անցյալ չունեցող անօրինական ներգաղթյալների վտարումը վարչակազմը դադարեցնում է: