ԲՀԿ անդամ, պատգամավոր Վարդան Բոստանջյանը այսօր տեղի ունեցած մամուլի ասուլիսում բավական անակնկալ, կարելի է ասել՝ սենսացիոն հայտարարություն է արել: Նա նշել է, որ «Բարգավաճ Հայաստան» կուսակցությունն առաջիկա խորհրդարանական ընտրությանը իրեն մրցակից է համարում միայն ՀՀԿ-ին, իսկ ընդդիմությանը հարգում, բայց մրցակից չի համարում: Ո՞րն է այստեղ անակնկալը կամ առավել ևս՝ սենսացիան՝ կարող եք հարցնել դուք: Սենսացիան ու անակնկալն այն է, որ ԲՀԿ-ն, Հանրապետականին հռչակելով իրեն մրցակից, փաստացի հայտարարում է կոալիցիոն հուշագիրը խզելու մասին: Խոսքը 2011 թվականի կոալիցիոն հուշագիրը խզելու մասին է, որը կնքվեց Սերժ Սարգսյանի, Արթուր Բաղդասարյանի և Գագիկ Ծառուկյանի միջև:
«Նոր փոփոխություններին ընդառաջ` կոալիցիոն կուսակցությունները միասնական են և նպատակ չունեն գալիք խորհրդարանական ընտրություններում իրենց քաղաքական կշիռն ավելացնել միմյանց դեմ պայքար ծավալելու և կոալիցիայի ներսում ուժերի հարաբերակցությունը փոխելու հաշվին»,- ասված էր փետրվարի 17-ին կնքված կոալիցիոն հուշագրում: Այսինքն՝ դա ուղղակիորեն նշանակում է, որ ՀՀԿ-ն ու ԲՀԿ-ն միմյանց դեմ չեն մրցելու: Մինչդեռ այժմ ԲՀԿ անդամը, ընդ որում՝ ամենևին ոչ շարքային անդամը, ինչի մասին է վկայում թեկուզ այն, որ Վարդան Բոստանջյանին Գագիկ Ծառուկյանը ԲՀԿ կողմից ներառել էր Կոնգրեսի հետ երկխոսող կոալիցիոն պատվիրակության կազմում, հայտարարում է ՀՀԿ-ին մրցակից լինելու մասին: Այլ կերպ ասած՝ այդպիսով ակնհայտ է դառնում, որ ԲՀԿ-ն, ըստ էության, խզում է կոալիցիոն այդ հուշագիրը և հայտարարում ներիշխանական պայքարի մեկնարկի մասին:
Կապվա՞ծ է արդյոք դա Ռուսաստանում տեղի ունեցած հայտնի իրադարձության հետ, որի համատեքստում Հայաստանում կանխատեսվում կամ սպասվում է նաև Ռոբերտ Քոչարյանի քաղաքական ակտիվություն: Ըստ ամենայնի՝ այո, նկատի ունենալով, որ ԲՀԿ-ն դիտվում է այն ուժը, որի վրա հենվելով՝ կփորձի քաղաքական ակտիվություն ունենալ Ռոբերտ Քոչարյանը: Սակայն, մյուս կողմից, ամենևին պետք չէ բացառել ԲՀԿ, այսպես ասած, ինքնուրույնությունը: Հնարավոր է, որ Գագիկ Ծառուկյանը պարզապես չի վստահում Հանրապետականին և ունի հիմնավոր, թեկուզ ոչ հրապարակային փաստեր, որ փետրվարի 17-ի կոալիցիոն հուշագիրը ծուղարկ էր, որի մեջ ՀՀԿ-ն գցեց ԲՀԿ-ին՝ խորհրդարանի ընտրությանը զրկելով մանևրելու հնարավորությունից:
