News Georgia-ի փոխանցմամբ՝ Վրաստանի ԱԳՆ-ը ցինիզմ է որակել ռուսական կողմի այն հայտարարությունը, թե նա հակամարտող կողմ չէ, փոխարենը՝ խաղաղարար է։ Խոսքը ՄԱԿ-ի Գլխավոր ասամբլեայի 66-րդ նստաշրջանում Ռուսաստանի արտգործնախարար Սերգեյ Լավրովի ելույթի մասին է։
Վրաստանի ԱԳՆ-ը հայտարարել է. «Նմանատիպ հայտարարություններով Ռուսաստանը շարունակում է իր կեղծավոր քաղաքականությունը՝ փորձելով համոզել միջազգային հանրությանը, որ ինքը հակամարտող կողմ չէ, խաղաղարար է և, հետևաբար, կարող է դառնալ խաղաղության ու անվտանգության երաշխավոր։
Ռուսաստանը նորից փորձում է պատրանք ստեղծել, թե Վրաստանի տարածքում իր ստեղծած օկուպացիոն ռեժիմները պետք է դիտարկվեն որպես միջազգային իրավունքի սուբյեկտներ։ Լավրովի հայտարարությունը ցինիզմի ավելի մեծ երանգ է ստանում Վրաստանի օկուպացված շրջանների ռազմականացման ու ռազմական հռետորիկայի ֆոնին։
Վրաստանի անկախությունից ի վեր՝ Ռուսաստանը պայքարում է նրա դեմ։ Ռուսաստանը նպատակամղված պայքարում է վրացական պետության, նրա ինքնիշխանության ու տարածքային ամբողջականության դեմ՝ կանոնավորապես ու ցուցադրաբար խախտելով միջազգային իրավունքի սկզբունքներն ու նորմերը, այդ թվում՝ նաև զինադադարի մասին համաձայնագիրը։
Լավրովի հայտարարությունը վկայում է, որ Ռուսաստանը փորձում է բաժանարար գծեր անցկացնել Եվրոպայում։ Նրա հայտարարությունը միանշանակ ցույց է տալիս, որ Ռուսաստանը նորից փորձում է հաստատել իր բացառիկ ազդեցության գոտիները՝ բաժանարար գծեր քաշելով Եվրոպայում»։
Հիշեցնենք, որ Լավրովը ՄԱԿ-ում հայտարարել էր. «Մենք լրջորեն մտադիր ենք անել անհրաժեշտ ամեն բան՝ թույլ չտալու համար, որ Կովկասում կրկնվի այն ուժային սցենարը, որը տեղի ունեցավ 2008 թվականի օգոստոսին։ Ռուսաստանը պատրաստ է հանդես գալ Աբխազիայի, Հարավային Օսիայի և Վրաստանի միջև ուժի կիրառման անընդունելիության վերաբերյալ պայմանավորվածությունների երաշխավորի դերում՝ հաշվի առնելով ավելի վաղ այդ երեք երկրների ղեկավարների հնչեցրած պաշտոնական հայտարարությունները։
Ռուսաստանը կողջուներ, եթե նմանատիպ պարտավորություններ ստանձնեին ԱՄՆ-ը ու ԵՄ-ը։ Որպես երաշխավոր՝ մենք պատրաստ կլինենք միջոցներ ձեռնարկել տարածաշրջանում բռնության չվերսկսվելու համար, իսկ կողմերից յուրաքանչյուրի կողմից ուժի կիրառման դեպքում հասնել իրավիճակի շուտափույթ կարգավորմանը՝ միջազգային իրավունքի գործող նորմերին համապատասխան»։
