«Մենք պլանավորել էինք արձանի մաքրման հստակ օրը` սեպտեմբերի 2-5-ն ընկած ժամանակահատվածում, երբ ականատես եղանք «Մենք ենք, մեր սարերը» արձանի անմխիթար վիճակին: Հետո այդ մասին գրեցինք Facebook-ում, գտանք հովանավորներ, սակայն հետաքրքիրն այն է, որ Ստեփանակերտի քաղաքապետարանը թույլ չտվեց մեզ արձանը լվանալ». սեպտեմբերի 25-ին այս մասին «Առաջին լրատվական»-ի հետ զրույցում տեղեկացրեց «Ամոթ է. մաքրենք պապիկ-տատիկի արձանը» նախաձեռնության կազմակերպիչներից Արմեն Սարգսյանը:
Նրանք իրենց մերժումը պատճառաբանել էին նրանով, որ պետք է պրոֆեսիենալ մոտեցում ցուցաբերել արձանի նկատմամբ, պետք է մաքրմանը մասնակցեն մասնագետներ, և որ «դրա համար բյուջերով գումար է նախատեսված»:
«Մեզ առաջարկվեց մաքրել Տիգրանակերտի տարածքը»,- ասաց Արմեն Սարգսյանը` շեշտելով, թե «Չենք լռելուն» ապատեղեկատվություն է տարածել՝ իբր իրենք չեն իմացել, որ արձանը չեն մաքրելու:
«Գնացինք ու տեսանք` արձանը մաքրված է, բայց ոչ մի տեղեկություն չկա, որ Արցախի կառավարությունն է մաքրել այն»,- նշեց Ա. Սարգսյանը` նշելով, որ ամենահավանական տարբերակն այն է, որ այն մաքրել են արցախցի երիտասարդները, քանի որ Ստեփանակերտի քաղաքապետարանը հստակ չի կարողանում պատասխան տալ, թե ով է մաքրել արձանը:
