Грузия Online փոխանցմամբ՝ Վրաստանի նախագահ Միխեիլ Սաակաշվիլին ընդգծել է, որ իր երկիրը կողջունի սեփական տարածքում Х-դիապազոնով ռադարի տեղակայումը, որը կազմում է հակահրթիռային պաշտպանության տարածաշրջանային համակարգի տարր և կոչված է Իրանից Կենտրոնական Ասիան ու Մերձավոր Արևելքը պաշտպանելուն։
Նշվում է, որ ներկայումս ամերիկյան սենատորներ Քիլն ու Քերքը Պենտագոնին ակնարկում են, որ անհրաժեշտ է ռադար տեղակայել ոչ թե Թուրքիայում, այլ՝ Վրաստանում։ Վրաստանի փոխվարչապետ Գիորգի Բարամիձեն դա որակել էր որպես բավական հետաքրքիր գաղափար։
Նա հայտարարել էր. «ԱՄՆ-ը Վրաստանի ռազմավարական գործընկերն է, և եթե Վրաստանի տարածքում ռադարի տեղակայման հարցը մտնի օրակարգ, ապա վրացական կողմն ամենայն լրջությամբ ու ադեկվատությամբ կդիտարկի այն»։
Վրաստանի տարածքում ռադար տեղակայելու վերաբերյալ ամերիկյան սենատորի առաջարկը պայմանավորված էր Թուրքիայի կառավարության նախապայմաններով։ Բանն այն է, որ պաշտոնական Անկարան համաձայն է սեփական տարածքում TPY-2 տիպի ռադարի տեղակայմանը՝ պայմանով, որ ԱՄՆ-ը դրանից ստացված տվյալները չի հաղորդելու Իսրայելին՝ որպես ՆԱՏՕ-ի անդամ չհանդիսացող երկրի։ Բացի այդ, Թուրքիան ցանկանում է լիովին վերահսկողության տակ առնել իր տարածքում տեղակայվելիք այդ ռադարի ղեկավարումը։
Հիշեցնենք, որ Թուրքիան և ԱՄՆ-ը Թուրքիայի տարածքում ռադարի տեղակայման մասին հուշագիրը ստորագրեցին սեպտեմբերի 14-ին Անկարայում։ Ռադարը տեղակայվելու է Թուրքիայի արևելյան հատվածում ընկած Մալաթիա նահանգի Քյուրեջիք վայրում՝ թուրք-իրանական սահմանից 540 կիլոմետր հեռավորության վրա։
