Մոսկվան և Պեկինը մի շարք կարևոր համաձայնություններ են ձեռք բերել Ռուսաստանի նախագահ Վլադիմիր Պուտինի և Չինաստանի նախագահ Սի Ծինփինի՝ 2024 թվականին կայացած հանդիպումների արդյունքներով։ Ինչպես տեղեկանում է ՏԱՍՍ գործակալությունից, այդ մասին Չինաստանի ղեկավարը հայտարարել է ՌԴ իր պաշտոնակցի հետ տեսակապով հանդիպման ժամանակ։
«2024 թվականին մենք երեք անգամ հանդիպել ենք Ձեզ հետ՝ Պեկինում, Աստանայում և Կազանում, և ձեռք ենք բերել մի շարք կարևոր համաձայնություններ», – ասել է նա։
Սի Ծինփինը հիշեցրել է, որ Մոսկվան և Պեկինը «հանդիսավոր կերպով նշել են Չինաստանի և Ռուսաստանի միջև դիվանագիտական հարաբերությունների հաստատման 75-ամյակը»։
«Չին-ռուսական հարաբերությունները, որոնց առանցքը հավերժական բարիդրացիությունն ու բարեկամությունն են, համապարփակ ռազմավարական փոխգործակցությունը և երկուստեք շահը, ավելի ու ավելի նոր կենսական ուժ են ձեռք բերում», – ընդգծել է Չինաստանի ղեկավարը։
Նա նաև հայտարարել է, որ Պեկինը և Մոսկվան կպաշտպանեն հարաբերությունների միջազգային համակարգը, որտեղ հիմնարար դերը պատկանում է ՄԱԿ-ին։
«Մենք մեր ռուս գործընկերների հետ միասին կաջակցենք ՄԱԿ-ի շուրջ կենտրոնացած միջազգային համակարգին, կպաշտպանենք Երկրորդ համաշխարհային պատերազմում հաղթանակը, որը ձեռք է բերվել միլիոնավոր մարդկանց արյունով և կյանքով ու կպաշտպանենք Չինաստանի և Ռուսաստանի՝ որպես ՄԱԿ-ի հիմնադիր երկրների և Անվտանգության խորհրդի մշտական անդամների իրավունքները», – ասել է նա։
Իր հերթին ՌԴ նախագահ Վլադիմիր Պուտինը շնորհավորել է Չինաստանի ժողովրդին և երկրի ղեկավար Սի Ծինփինին չինական Նոր տարվա առթիվ:
\
