Իտալիայի վարչապետ Սիլվիո Բեռլուսկոնիին կասկածում են, որ նա գործարար Ջամպաոլո Տարանտինիին ստիպել է կեղծ վկայություն տալ իր օգտին: Ինչպես հաղորդում է ANSA գործակալությունը, այդ գործընթացի շրջանակներում Տարանտինին մեղադրվում էր վարչապետի տանը մասնավոր երեկույթների ժամանակ մարմնավաճառների առևտրի մեջ:
Հետաքննության տեղեկություններով, 2008-2009թթ. ընթացքում Բեռլուսկոնիին մարմնավաճառներ մատակարարելու վրա նա ծախսել է մոտ 30 հազար եվրո: Ի տարբերություն մարմնավաճառության, որը Իտալիայում օրինական է համարվում, մարմնավաճառների առևտուրն օրենքով արգելվում է:
Վարչապետի հավաստմամբ՝ ինքը չի իմացել, որ խոսքը մարմնավաճառների մասին է, քանի որ Տարանտինին աղջիկներին ներկայացրել է որպես իր ծանոթներ: Ավելի ուշ, մասնավորապես Բեռլուսկոնիի հեռախոսային խոսակցություններից պարզվել է, որ վարչապետն, այնուամենայնիվ, իմացել է, թե ինչ «ծանոթների» է բերել Տարանտինին:
Agence France-Presse գործակալության տվյալներով, Տարանտինին վարչապետից պահանջել է ընդհանուր առմամբ 850 հազար եվրո, որպեսզի մեղքն իր վրա վերցնի:
Գործակալությունը հաղորդում է, որ այժմ Բեռլուսկոնիին կարող է ներկայացվել ևս մեկ մեղադրանք:
