«Սեպտեմբերին իշխանությունները պետք է կողմնորշվեին արտահերթ ընտրությունների հարցում: Տեխնիկապես կարող են մինչև սեպտեմբերի 30-ը պատրաստվել»,- այսօր հրավիրված ասուլիսի ընթացքում նշեց ՀԱԿ կենտրոնական գրասենյակի համակարգող Լևոն Զուրաբյանը:
Նրա խոսքերով` ակնհայտորեն կանգ են առել ճանպարհի կեսին` կարծելով, թե լարվածությունը թուլացել է և հետագա զիջումների կարիք չկա: Չհասկանալով, որ ժողովուրդը լարվածությունը թուլացրել է, որ երկխոսությունը շարունակվի և լուծում տա խնդիրներին: «Ուստի այսօր գալիս է պահը, երբ ժողովուրդը պետք է մտնի խաղի մեջ և իշխանություններին ձայնը հասցնի ուղիղ ձևով` հանրահավաքների մարդաշատությամբ, ուղիղ խոսքով և կոնկրետ գործողություններով:
Եվ, քանի որ պահը հասունացել է, ժողովրդին կոչ ենք անում սեպտեմբերի 30-ին մասնակցել համապետական հանրահավաքին: Կոնգրեսում տեղի են ունենում ինտենսիվ քննարկումներ, և սեպտեմբերին պետք է բեկում մտցնենք` հանրահավաքների մարդաշատության առումով:
Ավելին` համաքաղաքացիներին կոչ ենք անում առաջարկություններ ներկայացնել ժողովրդավարության ուղղությամբ»,- նշեց Լևոն Զուրաբյանը: