Ռազմական հանցագործությունների միջազգային դատախազը հայտարարել է, որ Սիրիայում զանգվածային հուղարկավորության վայրերում հայտնաբերված ապացույցները վկայում են տապալված առաջնորդ Բաշար Ասադի օրոք պետական «մահվան մեխանիզմների» մասին։
Նրա գնահատմամբ՝ 2013 թվականից ի վեր խոշտանգվել և սպանվել է ավելի քան 100 հազար մարդ:
Ելույթ ունենալով Դամասկոսի մերձակայքում գտնվող Քութայֆա և Նաջա քաղաքներում զանգվածային հուղարկավորության 2 վայրեր այցելելուց հետո՝ ԱՄՆ-ի հատուկ հանձնարարությունների գծով նախկին դեսպան Սթիվեն Ռապը Reuters-ին ասել է.
«Կա ավելի քան 100 հզ․ մարդ, որ անհետացել են և խոշտանգվել են մահվան այս մեխանիզմների մեջ: Ես կասկած չունեմ թվերի հաշվով՝ հաշվի առնելով այն, ինչ մենք տեսել ենք այս զանգվածային գերեզմաններում: Մենք նման բան չէինք տեսել նացիստների ժամանակներից ի վեր», – ասել է Ռապը։
Սթիվեն Ռապի խոսքով՝ պետական տեռորի համակարգը վերածվել է մահվան մեխանիզմի։ Ենթադրվում է, որ հարյուր հազարավոր սիրիացիներ սպանվել են 2011 թվականից ի վեր, երբ Ասադի կողմից նրա դեմ բողոքի ակցիաները ճնշելը վերաճեց լայնամասշտաբ պատերազմի: Եվ Ասադը, և նրա հայրը՝ Հաֆեզը, որը նրան նախորդել է նախագահի պաշտոնում և մահացել 2000 թվականին, երկար ժամանակ իրավապաշտպան կազմակերպությունների և կառավարությունների կողմից մեղադրվել են լայնածավալ արտադատական մահապատիժների մեջ։ Դրանք ներառել են զանգվածային մահապատիժներ երկրի բանտային համակարգում և քիմիական զենքի կիրառում ժողովրդի դեմ:
