Թուրքական Haberdar կայքի փոխանցմամբ՝ Թուրքիայի կենտրոնական և գյուղատնտեսական բանկերը պատասխանել են Լոս Անջելեսի դաշնային շրջանային դատարանում հայկական կողմի ներկայացրած հայցին։
Իրենց պատասխաններում թուրքական երկու բանկերն էլ նշել են, որ իրենք որևէ պատասխանատվություն չեն կրում 1915 թվականին հայերից խլված ունեցվածքի համար, քանի որ Թուրքիայի Հանրապետությունը հիմնադրվել է միայն 1923 թվականին։
Հիշեցնենք, որ ամերիկահայեր Ալեքս Բաքալյանը, Անաիս Հարությունյանը և Ռիտա Մահտեսյանը վերոնշյալ դատական հայցը ներկայացրել են 2010 թվականի դեկտեմբերին:
Նրանք պնդում են, որ Հայոց ցեղասպանության արդյունքում իրենք զրկվել են Ադանայի նահանգում ունեցած, իրենց պապերին պատկանած 49.5 հեկտար հողատարածքից, որում այժմ գտնվում է Ինջիրլիքի ամերիկյան ռազմաբազան: Դրա համար նրանք Թուրքիայի կենտրոնական և գյուղատնտեսական բանկերից պահանջում են 63.9 միլիոն դոլարի փոխհատուցում:
Բացի այդ, նրանք պահանջում են իրենց տրամադրել Ինջիրլիքի ռազմաբազայի վարձավճարից ցայժմ ստացված եկամուտների մի մասը, որով փոխհատուցման ընդհանուր քանակը հասնում է 100 միլիոն դոլարի։
Ի դեպ, օգոստոսի կեսին Լոս Անջելեսի դաշնային շրջանային դատարանը որոշում էր կայացրել թուրքական իշխանությունների դեմ երեք հայերի ներկայացրած հայցի առնչությամբ, որով Անկարային պարտավորեցրել էր պատասխանող կողմ դառնալ դատական գործընթացում:
