ԱՄՆ-ն Վենեսուելայի ընդդիմության առաջնորդներից մեկին՝ Էդմունդո Գոնսալես Ուրուտիային, ընտրություններից ամիսներ անց ճանաչել է հարավամերիկյան այս երկրի ընտրված նախագահ: ԱՄՆ պետքարտուղար Էնթոնի Բլինքենը հայտնել է, որ հուլիսին կայացած ընտրություններում վենեսուելացիները Գոնսալեսին են ընտրել նախագահ։
«Վենեսուելայի ժողովուրդը հուլիսի 28-ին հստակորեն արտահայտվել է: Ժողովրդավարությունը պահանջում է հարգել ընտրողների կամքը», – գրել է Բլինքենն X սոցիալական հարթակում:
Գոնսալեսն իր հերթին երախտագիտություն է հայտնել Վաշինգտոնի դիրքորոշման համար։
«Մենք մեծապես գնահատում ենք բոլոր վենեսուելացիների ինքնիշխան կամքի ճանաչումը։ Այս ժեստը հարգանքի տուրք է մատուցում փոփոխություններ տեսնելու՝ մարդկանց ցանկությանը և քաղաքացիական սխրանքին, որը մենք միասին կատարեցինք հուլիսի 28-ին», – գրել է քաղաքական գործիչը X-ում:
Ըստ Deutsche Welle-ի՝ Կարակասը քննադատաբար է արձագանքել ԱՄՆ պետքարտուղարի խոսքերին: Վենեսուելայի արտաքին գործերի նախարար Իվան Խիլն իր ամերիկացի գործընկերոջն անվանել է «Վենեսուելայի հանրաճանաչ թշնամի»:
Վենեսուելայում նախագահական ընտրությունները տեղի են ունեցել հուլիսի 28-ին։ Ընտրական հանձնաժողովը հայտարարել է, որ Նիկոլաս Մադուրոն, որը 2013 թվականից ի վեր երկու ժամկետ արդեն ղեկավարել էր երկիրը, ընտրություններում ստացել է ձայների 51,2 տոկոսը։ Միջազգային դիտորդներին թույլ չեն տվել ներկա գտնվել ընտրություններին։
Ընդդիմությունը հայտարարել է իր թեկնածու Էդմունդո Գոնսալեսի հաղթանակի մասին, որը վայելում է ԱՄՆ-ի աջակցությունը։ Ընտրությունների վիճելի արդյունքների դեմ երկրում բողոքի զանգվածային ցույցեր են անցկացվել։ Ակցիաների ընթացքում զոհվել է 28 մարդ, շուրջ 200-ը՝ վիրավորվել։ Ավելի քան 2000 ցուցարար ձերբակալվել է։
