Գերմանիայում Ազատ դեմոկրատական (լիբերալ) կուսակցությունում երեկ եղել է առաջին աղմկահարույց հրաժարականը, որը WikiLeaks սկանդալային կայքում ամերիկյան դիվանագիտության գաղտնի փաստաթղթերի հրապարակման արդյունք է: Հրաժարականի դիմում է ներկայացրել Հելմուտ Մեցները, որը այդ կուսակցության ղեկավար, Գերմանիայի արտաքին գործերի նախարար Գիդո Վեստերվելլեի աշխատակազմի ղեկավարն էր:
Փաստաթղթերից մեկում նշվում է, թե ինչպես է Մեցները ԱՄՆ՝ Բեռլինում տեղակայված դեսպանատանը փոխանցել 2009 թ. Գերմանիայի խորհրդարանական ընտրություններից հետո կոալիցիոն կառավարության ձևավորման բանակցությունների վերաբերյալ տեղեկություններ:
Այս կապակցությամբ գերմանական մամուլում հիշեցնում են, որ ավելի վաղ հրապարակված փաստաթղթերում նշվում էր, թե ամերիկյան դիվանագետները ծաղրանքով են վերաբերվում որոշ եվրոպացի ղեկավարների: Մերկելին այդ փաստաթղթերից մեկում ամերիկացիներն անվանել են մեծամիտ, ոչ կրեատիվ և ռիսկից խուսափող ղեկավար:
Այս մասին հաղորդում է RBC-ն:
