Սեպտեմբերի 25-ին Ֆրանսիայի Սենատի ընտրությունների ժամանակ ձախակողմյան կուսակցություններն ապահովել են մեծամասնություն: Այս մասին հաղորդում է France Presse գործակալությունը:
Ինչպես հայտարարել է Սոցիալիստական կուսակցության ներկայացուցիչ Ժան Պիեռ Բելը, նախնական տեղեկություններով՝ երկրի Սենատում իրենք կարողացել են ձեռք բերել քաղաքական մեծամասնություն: Նշվում է, որ ձախակողմյան կուսակցությունները 1958 թվից ի վեր առաջին անգամ կարողացել են երկրի խորհրդարանի վերին պալատում ստանալ մեծամասնություն: Սա նշանակում է, որ սոցիալիստների դիրքերն առաջիկա նախագահական ընտրություններից առաջ զգալիորեն բարելավվում են:
Սարկոզիի գլխավորած «Միություն հանուն ազգային շարժման» կուսակցության առաջնորդներից Ժան Ֆրանսուա Կոպեն նշել է, որ այս ընտրությունների արդյունքները հիասթափեցնող են, սակայն անակնկալ չէին: Նախագահական նստավայրից մեկնաբանություններ դեռ չեն եղել:
