Վրաստանի խորհրդարանի ընտրությունից հետո այդ երկիր է ժամանում Հունգարիայի վարչապետ Վիկտոր Օրբանը: Օրբանը առաջինն է շնորհավորել «Վրացական երազանք» կառավարող կուսակցությանը՝ խորհրդարանի ընտրությանը հաղթանակի կապակցությամբ: Օրբանի հանգամանքը ուշադրության է արժանի նրանով, որ Հունգարիան ներկայումս Եվրոպական միության նախագահող երկիրն է՝ մինչև ընթացիկ տարվա ավարտ: ԵՄ գործադիր իշխանությունը, ինչպես հայտնի է, քննադատում է Վրաստանի իշխանությանը, համարում, որ այն շեղվել է եվրոպական ուղղուց:
Օրբանը, սակայն, այլ կարծիքի է: Այստեղ հատկանշականն այն է, որ Օրբանը Եվրոպական միությունում տևական ժամանակ փորձում է ձևավորել աջերի բլոկ կամ դաշինք, որը դավանում է Եվրոպական միության քաղաքականության և ապագայի այլ մոտեցումներ: Վրաստանում փաստացի ներքաղաքական դիմակայության համատեքստում անցնում է ոչ միայն աշխարհաքաղաքական բևեռների դիմակայության բաժանարար գիծ, այլ նաև ըստ էության ներեվրոպական:
Վրաստանի նախագահ Սոլոմե Զուրաբիշվիլիի կոչով Վրաստանում այսօր երեկոյան սպասվում է ընդդիմադիր ուժերի հանրահավաք, ընդդեմ խորհրդարանի ընտրության արդյունք: Խորհրդարանի անցողիկ շեմը հաղթահարած, հավաքական իմաստով մոտ 40 տոկոս ձայն ստացած չորս ուժերը չեն ճանաչել ընտրության արդյունքն ու հայտարարել են, որ չեն վերցնի մանդատները:
Սակայն նրանք կկազմե՞ն հետընտրական պայքարի միասնական ճակատ, թե՞ ոչ: Այդ իմաստով, Վրաստանը հետընտրական մեծ լարման տակ է, որի լիցքաթափմանն հնարավոր տարբերակները, անշուշտ, բազմազան են: Վրաստանով «անցնող» ներեվրոպական «բաժանարար գիծը» հարևան երկրում ձևավորված քաղաքական իրավիճակի առանձնահատուկ հանգամանքներից մեկն է: Արդյո՞ք Վրաստանը կդառնա Եվրոպայի ապագայի վերաբերյալ Հին աշխարհամասում ծավալվող քաղաքական-գաղափարական քննարկումների «կովկասյան հարթակ»:
Սա առերևույթ մակարդակում քիչ ուշադրության արժանացող և նվազ դիտարժան հանգամանք է, գոնե մինչ այժմ, սակայն քաղաքական էության և աշխարհաքաղաքական շերտերի տեսանկյունից Վրաստանում ձևավորված իրադրության և հնարավոր զարգացումների առանցքային շերտերից մեկը, որը կարող է նաև ուշագրավ ասոցիացիաներ ունենալ նաև Հայաստանի հետ:
