Անկարայում ահաբեկչություն է տեղի ունեցել: Թուրքիայի ՆԳՆ հաղորդմամբ՝ չորս մարդ սպանվել է, տասնչորսը՝ վիրավորվել, նրանցից երեքի վիճակը գնահատվում է ծանր: Ահաբեկչության թիրախ է ընտրվել TAI ընկերությունը, որ ռազմա-արդյունաբերական ոլորտի ձեռնարկություն է:
Նախագահ Ռեջեպ Թայիթ Էրդողանը հայտարարել է, որ ժողովուրդը պետք է իմանա, որ Թուրքիային պարզված կեղտոտ ձեռքերն անպայման կջարդվեն, ո՛չ մի կառույց, ո՛չ մի ահաբեկչական կազմակերպություն, ոչ մի չարանենգ հնարք, որ ուղղված է մեր անվտանգության դեմ, չի կարող իր նպատակին հասնել:
Turkiye Today-ը դիտարկել է ահաբեկչության առաջին րոպեների տեսագրությունը և եզրակացրել, որ պատասխանատուն Քրդական բանվորական կուսակցությունն է: Ըստ այդմ՝ ահաբեկիչներն օգտագործել են АКC 74У տեսակի ավտոմատներ, որ քուրդ ահաբեկիչների հիմնական զենքերից մեկն է: Լրատվամիջոցը հատուկ ընդգծել է, որ ահաբեկիչները տաքսի մեքենա են առևանգել, ինչպես ՔԲԿ-ի մարտիկները՝ նախկինում, երբ Կեսարիայում հարձակվել են ՆԳՆ դեմ:
Չափազանց ուշագրավ է երկու հանգամանք: Առաջինը՝ Անկարայում ահաբեկչություն է տեղի ունեցել Իսրայելի ընդհանուր անվտանգության ծառայության և ոստիկանության այն հայտարարությունից ոչ լրիվ երկու օր անց, ըստ որի՝ ձերբակալվել է Իրանի օգտին լրտեսության մեջ կասկածվող ծագումով Ադրբեջանից յոթ անձ: Իսրայելական մամուլի տեղեկություններով՝ նրանք հանձնարարություններ ստացել են Թուրքիայում բնակվող կուրատորից, իսկ վարձատրությունը կատարվել է ՌԴ քաղաքացու միջոցով:
Երկրորդ՝ Անկարայի ահաբեկչության նախօրեին Թուրքիայի Ազգայնական շարժում կուսակցության առաջնորդ Բահչելին Քրդական բանվորական կուսակցության ցմահ ազատազրկված առաջնորդ Օջալանին առաջարկել է հայտարարել կուսակցությունը լուծարելու, Թուրքիայի դեմ զինված պայքարը դադարեցնելու մասին և անցնել քաղաքական լեգիտիմ գործունեության:
Թուրքիայում այդ տեսակետը ոչ միանշանակ է ընդունվել, իսկ ՔԲԿ-ից արձագանքել են, որ կեղծ խոստումներին չեն հավատում և երբեք չեն դադարեցնի զինված պայքարը: «Ի՞նչ է կատարվում Թուրքիայում» հոդվածում դիտարկել էինք, որ, հավանական է՝ Էրդողանն է նախաձեռնել քրդերի հետ հաշտության գաղափարը՝ վստահ լինելով, որ ՔԲԿ-ն չի ընդունի երկխոսության «անկեղծ հրավերը»:
Մեկ օր անց տեղի է ունեցել ահաբեկչություն, և Turkiye Today-ը և մի քանի այլ լրատվամիջոցներ արդեն իսկ ՔԲԿ-ին պատասխանատու և կազմակերպիչ են կարգել՝ չսպասելով, թե հատուկ ծառայությունները և ոստիկանությունը ինչ վարկած կառաջադրեն:
Այս ֆոնին Էրդողանը պատրաստվում է ո՞ւմ «կեղտոտ ձեռքերը ջարդել»: Նա նկատի ունի արտաքին դերակատարի՞, թե՞ Քրդական բանվորական կուսակցությանը: Արտառոց է, որ Թուրքիայի նախագահը, Կազանում ստանալով ահաբեկչության մասին լուրը, այցի ժամանակացույցի որևէ փոփոխություն չի կատարել:
Ավելին, ՌԴ նախագահի հետ հանդիպման բաց մասում Էրդողանը բավական մանրամասն պատմել է ահաբեկչության մասին: Ի՞նչ երաշխիքներ է ունեցել նա, որ չի ընդհատել այցը և շտապ չի վերադարձել Անկարա: Չէ՞ որ խոսքն ռազմա-արդյունաբերական համալիրի աչքի ընկած ձեռնարկությունը գրավելու փորձի մասին է: Քրդերի հետ «պատմական հաշտության հասնելու» հարցում Էրդողանի անկեղծությունը խիստ կասկածելի է: ՔԲԿ-ի դեմ լայնածավալ ռազմագործողություն սկսելու նրա ծրագիրն օրակարգից չի հանվել: Եվ վերջապես, ահաբեկչությանը գրեթե զուգահեռ Թուրքիայի խորհրդարանը ևս մեկ տարով երկարաձգել է ՄԱԿ-ի խաղաղապահ առաքելության կազմում Լիբանանում թուրքական զորախմբի մանդատը:
