ԱՄՆ բանակի շարքային զինծառայող Էդրյու Հոլմսը դատապարտվել է 7 տարվա ազատազրկման՝ Աֆղանստանում խաղաղ բնակիչների սպանելու համար: Այս մասին հայտնում է Associated Press-ը:
Դատավճիռը կայացվել է զինվորի կողմից իր մեղքն ընդունելուց մեկ օր անց: Հոլմսը հայտարարել է, որ 5 մետր հեռավորությունից կրակ է բացել և սպանել անմեղ մի աֆղանցու: Պարզվում է, որ Հոլմսը դատախազի հետ նախօրոք համաձայնության է եկել, և իր մեղքն ընդունելու դիմաց մեղադրող կողմը հրաժարվել է դատարանին ներկայացնել 15 տարվա ազատազրկման պահանջ:
Դեպքը տեղի է ունեցել անցած տարի, իրավապահները նշում են, որ ամերիկացի մի քանի զինվորականներ պարբերաբար սպանել են խաղաղ աֆղանցիների՝ զուտ «հետաքրքրության» համար, և նկարահանել են իրենց վայրագությունները:
Ավելի վաղ նույն գործի շրջանակներում 24 տարվա ազատազրկման էին դատապարտվել ևս երկու զինվորներ, ովքեր աֆղանցիներին սպանելուց հետո նրանց մարմնի տարբեր մասերն իրենց էին պահել՝ որպես հուշանվերներ:
