Օրերս Սևանա լճի փրկության համար առաջնահերթ միջոցառումների վերաբերյալ քննարկման ժամանակ, որին մանակցում էին բնապահպաններ և բնապահպանական հ/կ-ների ներկայացուցիչներ, Սևանա լճի վիճակը գնահատվեց ծայրահեղ կրիտիկական: Ստորև ներկայացնում ենք Սևանա լճի համար առանձնացված հիմնական վտանգները.
Ջրի կազմի փոփոխություն, ձկան անհետացում, լճի աղտոտում աղբով, կոյուղաջրերով, արտադրական թափոններով, GeoProMining Gold, «Գեգամետ պլյուս», «Միկա ցեմենտ» հանքարդյունաբերական ընկերությունների անօրինական գործունեություն, ինչը խախտում է «Սևանա լճի մասին» ՀՀ օրենքի 10-րդ հոդվածը, վերահսկողության բացակայություն, պաշտոնական կառույցների իմիտացիոն գործունեություն ու Սևանա լճի էկոհամակարգի պահպանման համար տրամադրված բյուջետային, դրամաշնորհային և վարկային միջոցների (մասնավորապես Համաշխարհային բանկի 16 միլիոն դոլարի վարկը, որը տրամադրվեց «Աղքատության նվազման և բնական ռեսուրսների կառավարման ծրագրի համար) ոչ նպատակային ծախսում:
«Էկոլուր» հ/կ նախագահ Ինգա Զառաֆյանից այսօր հետաքրքրվեցինք, թե ի՞նչ արձագանք են ստացել Բնապահպանության նախարարությունից, ինչին ի պատասխան ասաց. «Ոչ մի արձագանք չի եղել, չենք էլ սպասում, քանի որ մի քանի ամիս առաջ ենք պաշտոնապես դիմել Բնապահպանության նախարարությանը և ներկայացրել մեր վրդովմունքը: Այնինչ ստացել ենք շատ հետաքրքիր պատասխան: Նրաք խնդրել են ներկայացնել պրոյեկտ՝ այն դեպքում, երբ այդ ձեռնարկությունները կառուցված են»:
Ինչ վերաբերում է հետագա մարտավարությանը՝ Ինգա Զառաֆյանը նախընտրեց, գործի կարևորությունից ելնելով, այդ մասին առայժմ չբարձրաձայնել:
