«Ինչքան էլ իդեալական փաստաթուղթ մշակվի և ներկայացվի, բոլոր դեպքերում այդ փաստաթղթի տակ ստորագրություններ պետք է դնեն ոչ թե համանախագահները, այլ հակամարտության կողմերը: Այս իմաստով խնդիր է երկու կողմերի այսօր դրսևորած պատրաստակամությունն ու վճռականությունը հասնել լուծման»,- «Առաջին լրատվականի» հետ զրույցում անդրադառնալով այն հարցին, թե ԼՂ հակամարտության կարգավորման ձգձգման հիմքում ավելի շատ ներքի՞ն, թե՞ արտաքին գործոններ են ընկած՝ կարծիք հայտնեց քաղաքագետ, ԱՊՀ երկրների ինստիտուտի հայկական մասնաճյուղի տնօրեն Ալեքսանդր Մարկարովը:
Քաղաքագետը նկատեց, որ այսօր հիմնական խնդիրն այն է, որ վերջին մեկուկես տարվա ընթացքում տարբեր փոփոխություններով և նորացված տարբերակներով սեղանի վրա դրված փաստաթղթի շուրջ բանակցություններում կողմերն այդպես էլ չկարողացան հասնել այն տարբերակին, որը կբավարարեր բանակցային հիմնական խաղացողներին, և դրա արդյունքն էլ այն է, որ այսօր դեռևս չկա ոչ մի նոր առաջարկ, որի շուրջ հնարավոր կլիներ շարունակել բանակցային գործընթացը:
Քաղաքագետը նկատեց, որ երկրի ներքին զարգացումները ևս մեծ են բանակցային և ընդհանրապես արտաքին քաղաքական գործընթացների վրա. «Նախընտրական շրջանում արդեն կողմերից և ոչ մեկը, մասնավորապես այն երկիրը, որտեղ նախապատրաստվում են ընտրությունները, չի կարող, ըստ երևույթին, գնալ կտրուկ քայլերի արտաքին ասպարեզում»:
Ինչ վերաբերում է ԼՂ հակամարտության կարգավորման հարցում արտաքին ուժերի ազդեցությանը, Մարկարովը նկատեց, որ բանակցություններին մասնակից արտաքին ուժերի մեջ կա որոշակի համաձայնություն, որը վերաբերում է գերխնդրին` Հարավային Կովկասը ազատ պահել տարբեր տեսակի կոնֆլիկտներից. «Բնական է, նրանցից յուրաքանչյուրն այս տարածքում ունի իր սեփական շահերը, որոնք այս կամ այն չափով առնչվում են հակամարտության կողմ երկրների հետ, բայց այս շահերն, ըստ էության, հանգում են այն սկզբունքին, որ արտաքին ուժերը ցանկանում են այս տարածաշրջանը տեսնել կայուն և առանց կոնֆլիկտների, և այս իմաստով նրանց միջև համաձայնություն կա»:
