Իսրայելի արտաքին գործերի նախարար Ավիգդոր Լիբերմանը հայտարարել է, որ եթե Պաղեստինը միակողմանիորեն հռչակի իր անկախությունը, ապա այդ դեպքում Իսրայելի հետ բանակցությունները դժվար թե շարունակվեն: Ինչպես հայտնում է «Ռիա Նովոստին»` Լիբերմանն ասել է. «Դիմելու դեպքում դժվար թե Իսրայելի հետ բանակցությունները հնարավոր լինեն»:
Հիշեցնենք, որ այսօր Պաղեստինի ինքնավարության առաջնորդ Մահմուդ Աբբասը պետք է ելույթ ունենա ՄԱԿ-ի Գլխավոր ասամբլեայում: Սպասվում է, որ Պաղեստինի առաջնորդը վերջին շրջանում երկրի անկախության խնդրի շուրջ ընթացող բանակցությունների մասին մի շարք կարևոր հայտարարություններ կանի:
Մահմուդ Աբբասը մինչ այդ հայտարարել էր, որ մտադիր է դիմել ՄԱԿ-ի Անվտանգության խորհրդին՝ Պաղեստինի անկախությունը ճանաչելու պահանջով, սակայն ԱՄՆ-ը խոստացել էր վետո կիրառել այդ դեպքում և խափանել Պաղեստինի անկախության հռչակումը, քանի որ, ըստ Միացյալ Նահանգների, դա կսրի իրավիճակը տարածաշրջանում, և անկախությունը պետք է հռչակվի միայն Իսրայելի հետ բանակցությունների արդյունքում:
Պաղեստինի ինքնավարության ղեկավարը, սակայն, հնարավոր է՝ այս հարցը բարձրացնի Գլխավոր ասամբլեայում: Ինչպես նշում է euronews-ը, Մահմուդ Աբբասը անկախության հռչակման և լիիրավ անդամակցության մասին հավանաբար դիմում կներկայացնի ՄԱԿ-ի գլխավոր քարտուղար Բան Կի Մունին:
