ՀԱԿ հանրահավաքի ընթացքում իր ելույթում ՀԱԿ համակարգող Լևոն Զուրաբյանը նշեց, որ այժմ կարելի է փաստել, որ իշխանությունները դադարեցրել են ժողովրդի ճնշման տակ բանակցությունների միջոցով փոփոխությունների հասնելու համար իրականացվող գործընթացը`երկխոսությունը. «ՀՀ իշխանությունները ճանապարհի կեսին կանգ են առել և դադարեցրել են հետագա զիջումները, ավելին` մենք ունենք մեկ քաղբանտարկյալ»:
Զուրաբյանը նկատեց, որ իշխանությունների այդ քայլը տարբեր պատճառներ ունի, մասնավորապես՝ թերևս միջազգային ուժեղ ճնշումներ ԼՂ հարցում այս պահին չկան, և Սերժ Սարգսյանն իրեն ապահով է զգում և մտածում է, թե երկխոսության ընթացքում Կոնգրեսին վարկաբեկող քարոզչությանը լծված լրատվամիջոցները և քաղաքական ուժերը հասել են իրենց նպատակին, և Կոնգրեսն այլևս չի կարողանա վճռական գործողությունների գնալ:
Զուրաբյանը նկատեց, որ իշխանությունները ՀԱԿ-ին նոր ուղերձ են հղում՝ ասելով, թե եթե նոր զիջումներ եք ուզում, ապա հրապարակ հանեք, տասնյակ հազարավոր մարդիկ, ցույց տվեք, որ նրանք ցանկանում են պայքարել: Զուրաբյանը, դիմելով ժողովրդին, ասաց. «Մենք պատրա՞ստ ենք ընդունել այդ մարտահրավերը: Մենք պատրա՞ստ ենք հասկացնել ռեժիմին, որ միայն քաղբանտարկյալների ազատ արձակումով և Ազատության հրապարակը նվաճելով մենք չենք ընկրկելու, պատրա՞ստ ենք արդյոք մենք մեր նպատակներին հասնելու համար պայքարել մինչև վերջ»: «Այո՜»,- հետևեց ժողովրդի արձագանքը:
Զուրաբյանը հիշեցրեց, որ այս տարվա մարտին ՀԱԿ-ը ամբողջ ժողովրդին կոչ է արել սկսել քաղաքացիական անհնազանդության արշավ այս ավազակապետության դեմ, ինչը տեսնելով՝ ռեժիմը գնացել է բոլոր պահանջվող զիջումների, և այդ իսկ պատճառով արմատական այդ միջոցը այն ժամանակ չի կիրառվել և նախընտրել են բանակցությունները. «Բայց այսօր մենք կոչ ենք անում ժողովրդին պատրաստվելու քաղաքացիական անհնազանդության համազգային հաղթարշավի, որի շնորհիվ ժողովուրդը կվերագտնի սեփական երկրում իշխելու հնարավորությունը և անկախության քսանամյակը կնշանավորի ժողովրդավարության հաստատումով»:
