Այսօր Մարզահամերգային համալիրում տեղի կունենա աշխարհահռչակ երաժիշտ Յանիի համերգը, որի ժամանակ հայ հանդիսատեսին կներկայացվեն 20-25 հին և նոր կատարումներ: Լրագրողների հետ հանդիպման ժամանակ Յանին նշեց, որ թեև առաջին անգամ է Հայաստանում, բայց շատ է սիրել Հայաստանի մարդկանց և գուցե հաջորդ տարի այցելի մեր երկիր: Լրագրողները հետաքրքրվեցին, թե հայ երաժիշտներից ում գիտի և ում հետ է պատրաստվում համագործակցել, Յանին ասաց, թե չի պատրաստվում համագործակցել, բայց այսօր իր եղբայր Սամվել Երվինյանի հետ է, իսկ թե ինչպես է գտել նրան, Յանին խոսոտովանեց՝ շատ դժվարությամբ: Ի դեպ, Երվինյանի հետ համագործակցում է արդեն 9 տարի: Երաժշտին համերգից առաջ օգնում է աղոթելը:
Յանին հերքեց իր հայկական ծագման մասին լուրերը: Նա նշեց, որ հայկական խոհանոց է ճաշակել՝ «Երեկ երեկոյան ոչխարի չալաղաջ եմ կերել», ամեն ինչ համեղ է, և ինքը նույնիսկ չաղացել է: Համերգում փոփոխություններ կարող են լինել բեմի վրա, երբ կտեսնի հանդիսատեսի ռեակցիան: Ոչ մի համերգ մինչ այժմ չի կրկնվել, և ոչ մի հանդիսատես նույնը չէ: Կան հատուկ փոփոխություններ Հայաստանի համերգի համար: Լրագրողները հետաքրքրվեցին՝ արդյոք Յանին ունի՞ երազանք, որը չի կատարվել. «Այո, ունեմ, բայց չեմ կարող ասել, որովհետև երազանքներ կան, որոնց վրա աշխատում եմ հիմա, միայն ներողություն եմ հայցում, որ Հայաստան շատ ուշ եկանք»:
Սամվել Երվինյանից լրագրողները հետաքրքրվեցին՝ արդյոք հե՞շտ էր մուտքը։ Վերջինս ասաց, որ դժվար չէր: Սամվել Երվինյանի երկու տող նվագելուց հետո Յանին ասել է, որ Սամվելը իր հետ պետք է լինի: Ի դեպ, համերգին լրագրողների, ինչպես նաև օպերատորների մուտքը արգելված է: Երաժշտական գործիքների ընդհանուր քաշը գերազանցել է 11 տոննան: Հիշեցնենք, որ համերգի տոմսերը սպառված են, բայց համերգը հաջորդ օրերին չի կայանա, քանի որ բոլոր քաղաքներում կան պայմանավորվածություններ: Երևանից հետո Յանին համերգներով հանդես կգա Չինաստանում, Սինգապուրում, Դուբայում և այլուր:
