Infox.ru-ի փոխանցմամբ՝ խաղաղօվկիանոսյան Տուվալու կղզային պետությունը, Աբխազիայից բացի, ճանաչել է նաև Հարավային Օսիայի անկախությունը։ Հարավային Օսիայի և Տուվալուի միջև դիվանագիտական հարաբերությունների հաստատման մասին փաստաթուղթը ստորագրվել է սեպտեմբերի 19-ին Ցխինվալում։
Հարավային Օսիայի կողմից այդ փաստաթղթի վրա իր ստորագրությունն է դրել նախագահ Էդուարդ Կոկոյտին, իսկ Տուվալուի կողմից՝ վարչապետ Վիլլի Տելավին։
Փաստաթղթի ստորագրումից հետո Կոկոյտին հայտարարել է, որ Հարավային Օսիայի միջազգային ճանաչման գործընթացն անկասելի է. «Հարավային Օսիան պատրաստ է սերտ ու բարեկամական հարաբերություններ հաստատել Տուվալուի հետ։
Չնայած նրան, որ երկու երկրների միջև աշխարհագրական հեռավորությունը շատ մեծ է, մենք մշտապես պատրաստ ենք համագործակցել առաջադեմ երկրների հետ, որոնք գնահատում ու արժևորում են անկախության համար ժողովուրդների մղած պայքարը։ Հարավային Օսիան լուրջ փորձություններ է հաղթահարել։ Սակայն մեր ժողովուրդը կանգուն է մնացել և հասել իր առջև դրված նպատակին»։
Հիշեցնենք, որ 2008-2009 թվականներին Հարավային Օսիայի անկախությունը ճանաչել են Ռուսաստանը, Նիկարագուան, Նաուրուն և Վենեսուելան։
