Շիրակի մարզպետ Մուշեղ Մուրադյանն այսօր աշխատանքային այցով մարզում գտնվող ՀՀ փոխվարչապետ Տիգրան Խաչատրյանի գրասենյակի ղեկավար Արման Ադիլխանյանի, քաղաքաշինության կոմիտեի նախագահ Եղիազար Վարդանյանի, փոխվարչապետի գրասենյակի, քաղաքաշինության կոմիտեի և մարզպետի աշխատակազմի պատասխանատուների հետ այցելել է «Կապսի միջնակարգ դպրոց»՝ դիտարկելու դպրոցի նոր շենքի վերջնական փուլում գտնվող աշխատանքների ընթացքը։
Պաշտոնյաները շրջել են դպրոցում, զրուցել շինարարի հետ, տեղեկացել արված աշխատանքների մասին։
Հստակ ու խիստ հանձնարարական է տրվել շինարարին` արձանագրված թերացումների վերացման ուղղությամբ տարվող աշխատանքներին տեմպ հաղորդելու և անելու հնարավորը, որպեսզի տեղավորվեն դպրոցը շահագործման հանձնելու նախանշված ժամկետների մեջ։
«Փոքրաքանակ երեխաներով համալրված հանրակրթական դպրոցների մոդուլային շենքերի կառուցում» ծրագրի շրջանակներում կառուցվող դպրոցն ունենալու է բոլոր հարմարությունները՝ փակ մարզադահլիճ, ֆուտբոլային խաղադաշտ, արևային ֆոտովոլտային կայան, ապահովված է լինելու ապաստարանով:
