Թուրքական Zaman թերթի փոխանցմամբ՝ Թուրքիայի արտգործնախարար Ահմեդ Դավութօղլուն Նյու Յորքում մասնակցել է ՄԱԿ-ի՝ ահաբեկչության դեմ պայքարի համաժողովին։
Երբ այնտեղ պատրաստվում էր ելույթ ունենալ Իսրայելի փոխարտգործնախարար Դանի Այալոնը, Դավութօղլուն ցուցադրաբար լքել է դահլիճը։
Նշվում է, որ երեկ Դավութօղլուն հանդիպել է ԱՄՆ պետքարտուղար Հիլարի Քլինթոնի հետ։ Հանդիպման ժամանակ նրանք քննարկել են ահաբեկչության դեմ պայքարին, թուրք-իսրայելական լարված հարաբերություններին, ինչպես նաև կիպրական հարցին առնչվող խնդիրներ։
Դավութօղլուն Քլինթոնին իրազեկել է Թուրքիայի վարչապետ Էրդողանի արաբական շրջագայության մանրամասների մասին։ Դավութօղլուն երեկ հանդիպել է նաև իր բրիտանացի գործընկերոջ հետ։
Հիշեցնենք, որ երեք օր առաջ էլ թուրք պետնախարար, ԵՄ-ին Թուրքիայի անդամակցության գծով գլխավոր բանագնաց Էգեմեն Բաղըշը Ուկրաինայի Յալթա քաղաքում կազմակերպված «Ուկրաինան և աշխարհը. ընդհանուր սպառնալիքներ, ընդհանուր ապագա» խորագրով 8-րդ կոնֆերանսի ժամանակ ցուցադրաբար լքել էր կոնֆերանսի դահլիճը, երբ Իսրայելի նախագահ Շիմոն Պերեսը պատրաստվել էր սկսել իր ելույթը։
Դրանից առաջ էլ՝ 2009 թվականի սկզբին, Դավոսի համաժողովում էլ նույն Պերեսի ելույթի ժամանակ Թուրքիայի վարչապետ Էրդողանն էր ցուցադրաբար լքել դահլիճը։
