Նորաստեղծ տեխնոլոգիական ընկերություններն այսուհետ իրենց շահերը միասնական կպաշտպանեն. շաբաթ օրը Աղվերանում ՏՀՏ լիդերների առանց փողկապի հանդիպման ժամանակ հայտարարվել է ասոցիացիայի հիմնադրման մասին: Դրան անդամակցում են տեղեկատվական տեխնոլոգիաների ոլորտի շուրջ 25 նորաստեղծ ընկերություններ: Ասոցիացիայի նախագահ է ընտրվել «ԼԱՅՄ ՏԵԽ» ՍՊԸ տնօրեն Գևորգ Սաֆարյանը:
«Առաջին լրատվական»-ի հետ զրույցում ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանը նշեց, որ 11 տարի առաջ, երբ հիմնադրվեց ԻՏՁՄ-ն, կային 30 ընկերություններ, այսօր դրանք 350-ն են. «Երբ ոլորտի ընկերություների թիվը քիչ էր, նրանք հիմնականում համասեռ էին, և շահերը նման էին: Միությունը կարողանում էր համադրել շահերը և միասնական պաշտպանել դրանք: Ներկայում, միության լիիրավ անդամները հիմնականում կայացած, շուկայում իրենց դիրքը ձեռք բերած, փորձված ընկերություններ են, ու թեև ակնհայտորեն տեխնոլոգիական ոլորտի զարգացումը՝ որպես նպատակ, նույնն է թե’ նորստեղծի, թե’ կայացածի համար, բայց նորաստեղծների խնդիրները շատ յուրահատուկ են»:
Կ. Վարդանյանի խոսքով՝ ցանկացած երկրում հենց նորաստեղծ ընկերություններն են խթանում պետության զարգացումը, հատկապես` փոքր ու միջին նորաստեղծ ձեռնարկութունները: Սրա մասին շատ հստակ ասել է նաև անցած տարի մեր երկիր այցելած «Ինտել» կորպորացիայի տնօրենների խորհրդի նախագահ, դոկտոր Քրեյգ Բարրեթը: Նրա խոսքով՝ ԱՄՆ տեխնոլոգիական հզորությունը կապված չէ ո’չ «Ինտելի», ո’չ «Մայքրոսոֆթի», ո’չ «Սինոփսիսի», ո’չ «Դելի» կամ այլ ընկերությունների հետ, այլ կապված է տասնյակ հազարավոր տեխնոլոգիական մանր ընկերությունների հետ, որոնք շուկայական վիճակի համընկնման շնորհիվ դառնում են «Մայքրոսոֆթ», «Ինտել» և այլն:
«Մենք նույնպես կարծում ենք, որ հատուկ պետք է խրախուսվի տեխնոլոգիական ձեռներեցությունը, որովհետև բավական հետ ենք առօրյա կիրառման առումով: Այդ հետընթացը փակելու համար պետք է ունենանք շատ ձեռնարկություններ, որոնք անհատին, կառավարությանը, բիզնեսին կսպասարկեն տեխնոլոգիական առումով: Քանի որ մեր ընկերությունների մեծ մասն արտահանման միտում ունի, ներքին շուկան մնում է չսպասարկված: Էլ չեմ ասում, որ արտաքին շուկան էլ բավական մեծ տեմպերով աճում է»,- նշեց Կ. Վարդանյանը:
ՏՏ զարգացման հայեցակարգում նշված է, որ մինչև 2018 թ. պետք է ստեղծվի 1000 ձեռնարկություն: Այսօր գրոծում են 350-ը, նշանակում է` հարկավոր է ևս 650 գործող կազմակերպություն: Կ. Վարդանյանի համոզմամբ` նորաստեղծ ընկերությունների ասոցիացիան դառնալու է այս ոլորտի հիմնական շարժիչ ուժերից մեկը:
Ընդ որում, «նորաստեղծ ընկերություն» հասկացության որևէ սահմանափակում չկա. իրեն նորաստեղծ կարող է համարել անգամ 20 տարի գործող ընկերությունը: Տնտեսական գործունեության առումով մեր երկրում նորաստեղծ ընկերությունը ոչ մի արտոնություն չունի, մինչդեռ աշխարհի գրեթե բոլոր երկրներում նորաստեղծներն առավելություններ ունեն` մի քանի տարի ազատվում են հարկերից, ֆինանսավորման արտոնություններ կան և այլն:
«Բոլորը հասկանում են, որ տնտեսության մոլեկուլը ձեռնարկության ստեղծումն է: Եթե դա չստեղծես, ինչքան ուզում ես գնաճի կամ բանկային տոկոս մեծացրու-փոքրացրու՝ արդյունք չի տալու, և դա մեր 20 տարվա կյանքը ցույց տվեց: Պետք է տնտեսութունում խաղացող ստեղծել: Մենք շատ շուտով կգանք դրան, որ պետք է աջակցել նոր ձեռնարկությունների ստեղծմանը»,- համոզված է Կ. Վարդանյանը: