ՆԳՆ Փրկարար ծառայության տնօրենի տեղակալ, փ/ծ գնդապետ Եգոր Կարապետյանի գլխավորությամբ ստեղծված աշխատանքային խումբը Գեղարքունիքի մարզային փրկարարական վարչությունում էր։
Աշխատանքային այցի նպատակը վարչությունում և ենթակա ստորաբաժանումներում համալիր ստուգումներ իրականացնելն էր՝ ուղղված մասնագիտական գիտելիքների բարելավմանը և մեթոդական օգնության ցուցաբերմանը։
Աշխատանքային խմբում ներգրավված էին ՓԾ կառուցվածքային ստորաբաժանումներից պատասխանատու ոլորտների ծառայողներ, ովքեր ըստ ուղղությունների իրականացնելու էին ուսումնասիրություններ՝ մասնագիտական աջակցություն ցուցաբերելու նպատակով։ Մեկնարկը տրվել է Գեղարքունիքի մարզային փրկարարական վարչությունում տեղի ունեցած աշխատանքային խորհրդակցությունով, որին ներկա էին վարչության և ենթակա ստորաբաժանումների ղեկավար կազմը։
Խորհրդակցության ընթացքում աշխատանքային խմբի ղեկավար փ/ծ գնդապետ Կարապետյանը ներկայացրել է, որ աշխատանքային այցի նպատակը տեսագործնական գիտելիքների ու հմտությունների բարելավումն է, ինչպես նաև անհրաժեշտ մեթոդական-մասնագիտական խորհրդատվության ցուցաբերումը։ Գեղարքունիքի մարզային փրկարարական վարչության պետ, փ/ծ գնդապետ Գ․ Գալստյանը ՓԾ տնօրենի տեղակալին ներկայացրել է աշխատանքային օրակարգը, 2024 թվականի առաջին եռամսյակում կատարած աշխատանքների արդյունքները և վարչության գործունեությանն առնչվող այլ հարցեր։
Քննարկվել են մի շարք աշխատանքային հարցեր, վեր են հանվել առկա խնդիրները և նախանշվել են աշխատանքների ընթացքը։ Խորհրդակցության ավարտին հաջորդել են այցերը մարզային ենթակայության ստորաբաժանումներ։ Այցի շրջանակներում տնօրենի տեղակալը եղել է մարզային փրկարարական վարչության Սևանի, Գավառի, Վարդենիսի, Մարտունու, Ճամբարակի հրշեջ-փրկարարական ջոկատների և հատուկ ջրափրկարարական ջոկատի տարածքում, զրուցել անձնակազմի հետ, հետևեց ծառայության կրման պայմաններին։
Փրկարարական ծառայողների ամառային համազգեստի անցմամբ պայմանավորված՝ ստուգվել են ծառայողների պատշաճ արտաքին տեսքը, շարային կեցվածքը, ծառայողական վկայականների առկայությունը։ Ջոկատներում հայտարարվել է տագնապ և անձնակազմի հավաք: Ստուգվել են ծառայողների ընդհանուր պատրաստվածությունը, տագնապային պայուսակների առկայությունն ու համալրվածությունը, ինչպես նաև հրշեջ-փրկարարական տեխնիկայի և գույք-սարքավորումների տեխնիկական վիճակը։
Այնուհետև, Մարտունու հրշեջ-փրկարարական ջոկատում, անակնկալ կերպով անցկացվել է «Հրդեհաշիջումը բենզալցակայաններում» թեմայով հատուկ-տակտիկական ուսումնավարժանք, որի նպատակն էր իրատեսական պայմաններում ստուգել հրշեջ-փրկարարների օպերատիվ-տակտիկական հնարավորությունները, ինչպես նաև մարտական պատրաստվածությունը։ Տրվել է պայմանական «Տագնապ» ազդանշան և դեպքի վայր է մեկնել 2 մարտական հաշվարկ, որոնք տեղում իրականացրել են տարածքի հետախուզում, կազմակերպել են փրփրահեղուկի գրոհ այրվող վառելանյութի հատվածում, իսկ երկրորդ մարտական հաշվարկը կազմակերպել է հրդեհաշիջում՝ ջրով։
Վարժանքի ավարտին մասնագետները, վերլուծելով արդյունքները, տեղում վեր են հանել թերացումները և մասնագիտական խորհրդատվություն ցուցաբերեցին անձնակազմին։ Այցի ավարտին աշխատանքային խմբի ղեկավարը հորդորել է հետևել մասնագետների ցուցումներին, տվել հստակ հանձնարարականներ՝ կարողությունների բարելավման և աշխատանքներն առավել արդյունավետ իրականացման ուղղությամբ։
