«Ավազակապետերի հետ կարելի է բանակցել` երկիրը իրենց լծից փրկելու ուղղությամբ, ոչ թե խրախճանքի մասնակցել»,- անդրադառնալով խորհրդարանում Սերժ Սարգսյանի հրավիրած ընդունելությանը ՀԱԿ ներկայացուցիչների մասնակցության հարցին` ասաց ՀԱԿ համակարգող Լևոն Զուրաբյանը:
Լևոն Զուրաբյանը նշեց, որ ՀԱԿ ներկայացուցչներից որևէ մեկը չի մասնակցելու այդ ընդունելությանը:
Տեղեկացնենք, որ այսօր ԱԺ-ում Սերժ Սարգսյանն ընդունելություն է հրավիրել, որին հրավիրված են վերջին քսան տարիների ընթացքում Հայաստանի բոլոր գումարման խորհրդարանների ներկայացուցիչները:
Հարցին, թե ՀՀ հիմնադիր նախագահ Լևոն Տեր-Պետրոսյանը, հանուն անկախության 20-ամյակի, չէ՞ր կարող մի կողմ դնել բոլոր խնդիրները և մասնակցել տոնական միջոցառումներին, Զուրաբյանը պատասխանեց. «Հանուն համազգային համերաշխության, հանուն անկախության տոնի` այս իշխանություններն էլ կարող էին մի մեծ նվեր անել ժողովրդին` անցկացնելով լեգիտիմ ընտրություններ և ձևավորելով լեգիտիմ իշխանություններ Հայաստանում: Եթե դա արվեր մինչև 20-ամյակի լրանալը, հավատացեք շատ մեղքեր այս թալանչիներին կներվեին»:
Իսկ հարցին, թե հնարավոր չէ՞, որ Առաջին նախագահը գոնե մասնակցեր զորահանդեսի ընդունման արարողությանը, Զուրաբյանը պատասխանեց. «Եթե ինքը ընդուներ զորահանդեսը, ապա մեծ հաճույքով կմասնակցեր»:
