Նիկոլ Փաշինյանի մարտի 12-ի ասուլիսից հետո մեծ աղմուկի եւ ուշադրոության առարկա է դարձել այն, որ նա հրապարակել է իր եւ պաշտպանության նախկին նախարար Արշակ Կարապետյանի՝ նախարար եղած շրջանում WhatsApp-ի միջոցով նամակագրությունից հատված, փորձելով դրանով հիմնավորել այն, թե Արշակ Կարապետյանն է եղել պատասխանատու Հայաստանի տարածք ադրբեջանական զինուժի առաջխաղացման համար, որ տեղի է ունեցել 2021-ի մայիսին:
Արշակ Կարապետյանը հասցրել է հայտարարել, թե դա սուտ է: Մինչ հասարակությունը աշխուժորեն քննարկում է հանգամանքը, որ պետական բարձրաստիճան պաշտոնյաները պետական անվտանգության կարեւորագույն հարցերի թեմայով միմյանց հետ փաստորեն շփվում են սոցնացյաին տեխնոլոգիայով, եւ հետո դա էլ վարչապտի մակարդակով դառնում է հրապարակման ենթակա, կարծես թե դրա տակ բավականին նրբորեն աշխատում է այն հնարքը, որ Նիկոլ Փաշինյանը թերեւս բանեցրեց ասուլիսի ընթացքում գնալով այդ քայլին: Պաշտպանության նախկին նախարար Արշակ Կարապետյանը ամիսներ առաջ հայտարարեց Փաշինյանին հեռացնելու շարժում սկսելու մասին:
Կարապետյանը ներկայումս պարբերաբար տալիս է հարցազրույցներ, ունենում է ընդդիմադիր ելույթներ: Նրան պաշտոնից ազատելու առնչությամբ ունեցած ելույթում, երբ ներկայացնում էր պաշտպանության նոր նախարարին, Հայաստանի վարչապետ Նիկոլ Փաշինյանը հայտարարեց. «Պարոն Կարապետյանին այսօր առավոտյան ասել եմ, որ շարունակում եմ իրեն համարել թիմակից»: Մարտի 12-ի ասուլիսում Փաշինյանը հայտարարում է, թե Կարապետյանը կամ եղել է դավաճան՝ թույլ տալով ադրբեջանցիներին գալ առաջ, կամ չի տիրապետել իրավիճակին: Մինչդեռ, նոր նախարար Պապիկյանին ներկայացնելիս՝ 2021-ի նոյեմբերին, Նիկոլ Փաշինյանը շնորհակալություն էր հայտնում Արշակ Կարապետյանին, որ համաձայնել էր ստանձնել պաշտպանության նախարարի խոցելի կարգավիճակը: Եթե նա կամ «դավաճան» էր, կամ անտեղյակ, Փաշինյանը ինչի՞ համար էր նրան հայտնում շնորհակալություն եւ համարում թիմակից:
Թե՞ հենց այդ՝ թիմակցության շրջանակում էլ ծավալվում է ներկայիս քաղաքական խաղը եւ Նիկոլ Փաշինյանը ասուլիսում հանրայնացնելով ինչ որ հաղորդագրություններ, ընդ որում ակնհայտորեն սեղմված եւ սահմանափակ հատվածով, ըստ էության կամա, թե ակամա քաղաքական փոխանցում է կատարում Արշակ Կարապետյանին: Համենայն դեպս, զուտ քաղաքական հարաբերակցության տեսանկյունից, Փաշինյանի ասուլիսային հայտարարարություններն ու «բացահայտումը» կարող է միմիայն նպաստավոր փոխանցում լինել Կարապետյանի համար, անկախ այն հանգամանքից՝ Փաշինյանը նրան շարունակու՞մ է համարել թիմակից, թե՞ հակառակորդ:
