Հայաստանի քննչական կոմիտեն հայտնում է Աբովյան քաղաքում զանգվածային ծեծկրտուքի մասին, որ տեղի է ունեցել ուղեւորափոխադրում իրականացնող ընկերություններից մեկի աշխատակիցների մասնակցությամբ, նաեւ զենքի գործադրմամբ: Ավելի կոնկրետ, տասնյակ կամ ավելի աշխատակիցները հարձակվել են մի քաղաքացու վրա, որն ըստ երեւույթին փորձել է իր մեքենայով Երեւանից ուղեւորափոխադրում անել դեպի Աբովյան:
Սա իհարկե հնարավոր է ենթադրել քննչական կոմիտեի տարածած հաղորդագրությունից, որն ուղեկցվում է նաեւ տեսանյութով: Տեսանյութում հստակ երեւում է, թե ինչպես օրը ցերեկով, հանրային բաց վայրում, ճակատագրի դառը հեգնանքով կամ տխուր խորհրդանշականությամբ՝ Սահմանադրության հրապարակում, հետապնդում են քաղաքացուն, փակում նրա մեքենայի ճանապարհը իրենց մեքենաներով, եւ տեսնում ինքնադատաստան: Կրակողը ձերբակալված է, իսկ այլ մասնակիցներ՝ որոնվում են: Առաջանում է պարզ հարց՝ Հայաստանի հանրապետությունը, որ վարչապետ Փաշշինյանի խոսքով՝ առաջին անգամ է որպես պետություն հարաբերվել սիգի հետ, որպես պետություն ի վերջո կհարաբերվի՞ քրեական ենթամշակույթի տարատեսակ դրսեւորումների «հետ» եւ կլուծի այդ ենթամշակույթը կամ մշակույթը արմատախիլ անելու հարցը:
Ի վիճակի՞ է օրինակ աշխարհաքաղաքական համարձակության մասին առավոտից երեկո ճամարտակող խորհրդարանական մեծամասնությունը նույնպսիի համարձակությամբ գնալ իր իսկ ընդունած օրենքի կիրառման հետեւից եւ ոչ միայն խոսքով, այլ նաեւ գործով պայքարել Հայաստանում քրեական ենթամշակույթի դրսեւորման դեմ, արմատախիլ անել այդ երեւույթը գործնականում, այլ ոչ թե միայն ցուցադրականում: Եթե որեւէ մեկին թվում է, թե պետական անվտանգության տեսանկյունից վերը նշածս երեւույթը ունի նվազ կարեւորություն, քան աշխարհաքաղաքական «կամքի» մասին պոռոտախոսությունը, ապա մեղմ ասած սխալվում է չարաչար: Եվ ավելին, աշխարհաքաղաքականության մեջ որեւէ բանի ունակ են այն պետությունները, որոնք ունակ են օրենքի եւ հասարակական հարաբերությունների պատշաճ մշակույթ ձեւավորել սեփական տարածքում:
