ԱԺ ՀՀԿ-ական պատգամավոր Լեռնիկ Ալեքսանյանը, արձագանքելով իրենց կուսակցության փոխնախագահ Ռազմիկ Զոհրաբյանի այն հայտարարությանը, թե հաջորդ խորհրդարանում իրենց պատգամավորների զգալի մասը չեն անցնի խորհրդարան, քանի որ իրենց մումիաներ պետք չեն, ասաց. «Ցուցակները դեռևս չկան: Համենայնդեպս ես դրանց գոյության մասին չգիտեմ: Ոչ միայն պաշտոնապես, այլ նաև ստվերային ցուցակներ էլ չկան: Սկզբունքները կան:
Մեր խորհրդի նիստերում նախագահը, խորհրդի անդամները ընդհանուր սկզբունքներ են մշակում, որ պետք է խորհրդարան գան այն մարդիկ, ովքեր կարող են և ցանկություն ունեն օրենսդիր գործունեությամբ զբաղվելու: Այս խնդիրը կուսակցությունում դրված է: Բայց անձնավորված որևէ բան ես չգիտեմ: Ավելին, եթե ես՝ որպես խորհրդի անդամ, չգիտեմ, ուրեմն չկան դրանք: Որևէ ցուցակ չկա, անձանց շուրջ խոսակցություններ չկան:
Բայց սկզբունքները մշակվում են, որ պետք է խորհրդարան գան մարդիկ, ովքեր օրենսդրությամբ զբաղվելու և՛ ցանկություն ունեն, և՛ հնարավորություն»:
