Մենք երեկ արդեն գրել էինք Ռուսաստանի վարչապետ Վլադիմիր Պուտինի՝ CNN հեռուստաընկերության հայտնի հաղորդավար Լարի Քինգին տված հարցազրույցի մասին: CNN-ը նախորդ օրը որոշ մանրամասներ էր հրապարակել այդ հարցազրույցի վերաբերյալ, այսօր էլ հարցազրույցն ամբողջությամբ է հեռարձակվել: Պուտինը խոսել է ռուս գործակալների, Իրանի, իր ընտանիքի մասին:
Պուտինին հարց է տրվել այս տարի ԱՄՆ-ում ձերբակալված 10 գաղտնի գործակալների մասին. «Այդ մարդիկ, անկասկած, հարգանքի են արժանի: Ես արդեն ասել եմ և նորից կարող եմ կրկնել՝ իրենց գործունեությամբ նրանք վնաս չեն հասցրել Միացյալ Նահանգների շահերին: Ինչպես գիտեք, նրանք պատկանում են հատուկ մի ծառայության` անօրինական հետախուզության ծառայությանը, ունեն իրենց խնդիրները, և այդ խնդիրները, որպես կանոն, ակտուալ են դառնում ճգնաժամային պահերին, ասենք՝ դիվանագիտական հարաբերությունների խզման ժամանակ»,- նշել է Պուտինը:
«Փառք Աստծո, որ Միացյալ Նահանգների և Ռուսաստանի միջև հարաբերություններն այդ վիճակի չեն, և ես հուսով եմ, որ երբեք էլ չեն լինի»,- ավելացրել է նա: Լարի Քինգի այն հարցին, թե՝ «նրանք չե՞ն լրտեսել ձեր հրամանով», Պուտինը կրկնել է` «նրանք վնաս չեն տվել Միացյալ Նահանգներին»:
Խոսելով Օբամայի մասին՝ Պուտինն ասել է, որ «ԱՄՆ նախագահը լուրջ խնդիրների առաջ է, հատկապես տնտեսությունում և սոցիալական ոլորտում: «Ես չպետք է դատեմ՝ ճիշտ է նա գործում, թե ոչ, երբ Կոնգեսում առաջարկեց առողջապահության մասին օրինագիծը, բայց ես չեմ կասկածում, որ դեպքում Օբաման արել է ամեն ինչ, որպեսզի արդարացնի ամերիկյան ժողովրդի սպասելիքները, որոնց մասին նա խոսել է նախընտրական շրջանում: Նա խոստացել և արել է դա»:
Աֆղանական խնդիրների մասին խոսելիս՝ Պուտինն ասել է, որ ռուսական կողմը համագործակցում է Արևմուտքի հետ: «Ես կարծում եմ, որ Աֆղանստանում միջազգային կոալիցիան այսօր կատարում է կարևոր և դրական առաքելություն: Մենք չենք կարող և չենք էլ մասնակցի այնտեղ ռազմական միջոցներով, բայց մենք և՛ ամերիկյան գործընկերներին, և՛ միջազգային կոալիցիայի այլ գործընկերներին աջակցում ենք տարբեր մեթոդներով: Մենք պայմանավորվել ենք տրանզիտի ապահովման մասին, և դա անում ենք ոչ միայն օդով, այլ նաև ցամաքով»: Պուտինը նշել է, որ «եղել են դեպքեր, երբ մեր ուղղաթիռները ամերիկյան և հոլանդական զորքերին փրկել են գնդակոծումից»:
